MANISPAA YA SINGIDA YAVUKA LENGO CHANJO YA POLIO

Posted on: May 24th, 2022

Halmashauri ya Manispaa ya Singida imevuka lengo la uchanjaji chanjo ya polio kwa watoto walio na umri wa chini ya miaka mitano mbali na changamoto zilizojitokeza wakati wa zoezi la chanjo hilo.

Hayo yamesemwa leo tarehe 24.05.2022 na Mratibu wa chanjo wa Manispaa ya Singida Bi. Digna Sakaya baada ya kukamilisha majumuisho ya takwimu ambapo alisema lengo la Manispaa lilikuwa kuchanja jumla ya Watoto 27,687 lakini wameweza kuvuka lengo kwa kuchanja Watoto 39,841 sawa na asilimia 144 (%)

Akizungumzia zoezi la utoaji chanjo ya polio Bi. Sakaya  amesema mwitikio wa wananchi kwa maeneo ya mjini na vijijini ulikuwa mzuri hali iliyopelekea kufikia asilimia hizo.

Amesema pamoja na mafanikio makubwa waliyopata zoezi hilo lilikumbwa na changamoto mbalimbali ikiwemo muda wa utekelezaji wa zoezi la chanjo kuwa mfupi kwani zoezi hilo liliendeshwa kwa siku 4.

Alizitaja changamoto zingine kuwa ni mbinu ya kupita nyumba kwa nyumba kuwa na ugumu hasa kwa watumishi na pia kuchelelewa kupokelewa kwa fedha za uendeshaji wa zoezi hilo.

Wananchi katika Manispaa ya Singida wameitikia kwa wingi wito wa kupeleka Watoto wao walio na umri chini ya miaka mitano (5) kupata chanjo ya polio kufuatia kampeni ya chanjo hiyo iliyozinduliwa kimkoa wilayani Mkalama tarehe 18.05.2022 na Mkuu wa Mkoa wa Singida Dr. Binirith Mahenge ambapo pamoja na huduma ya chanjo kutolewa katika vituo lakini pia mbinu ya kupita nyumba kwa nyumba ilitumika.

Jumla ya vituo 18 vya kutolea huduma za afya vya binafsi na vya Serikali vilihusika katika utoaji wa chanjo hiyo.

Zoezi la utoaji chanjo ya polio katika kituo cha afya Sokoine, Manispaa ya Singida