MANISPAA YA SINGIDA YAWEZESHA VIJANA KUJIKWAMUA KIUCHUMI

Posted on: September 20th, 2022

SINGIDA,

Septemba 17, 2022.

MANISPAA ya Singida imewapatia mafunzo vijana 120, kutoka kata 18 ili kuwajengea uwezo wa kilimo cha mbogamboga,kwa njia ya teknolojia ya kitalu nyumba kwa ufadhili wa Ofisi ya Waziri mkuu,sera,Bunge,uratibu,kazi,vijana,ajira na watu wenye ulemavu.

Akitoa taarifa kwa Waziri wa nchi, ofisi ya Waziri mkuu, kazi, vijana na ajira, profesa Joyce Ndelichako, aliyekuwa katika manispaa ya Singida, ofisa kilimo wa manispaa ya Singida Faustine Kiyui, alisema mafunzo hayo yamegaharimu shilingi milioni 30.

“Serikali imegharamia zaidi ya shilingi milioni 30 kwa ajili ya ujenzi wa kitalu nyumba na mafunzo kwa vijana, waongeze uzalishaji wa mboga mboga kwa kutumia tekolojia ya kitalu nyumba….yalitolewa na wataalamu wa chuo cha kilimo Sokoine,” alisema Kiyui.

AFISA kilimo manispaa ya Singida, Faustine Kiyui (aliyesimama), akitoa maelezo juu ya mradi wa kitalu nyumba, mbele ya Waziri wa nchi, ofisi ya Waziri mkuu, kazi, vijana na ajira, profesa Joyce Ndelichako, aliyefanya ziara ya siku moja kukagua miradi mbalimbali inayosimamiwa na wizara yake.

Alifafanua kuwa, kati ya vijana hao, 20 walipata mafunzo ya ujenzi wa kitalu nyumba na wengine 100 wamenufaika na uzalishaji wa mboga mboga kibiashara, yaliyotolewa kwa nadharia na vitendo mwezi februali na machi mwaka huu ili wamudu vema kilimo hicho.

Akizungumza juu ya mradi wa kitalu nyumba, katibu wa mradi Emmaculatha Nkumbi, alisema kuwa, kutokana na mafunzo hayo, wameweza kuongeza uzalishaji, hivyo kupanua soko, kulingana na mahitaji ya mbogamboga hivi sasa.

“Naishukuru serikali kuendesha mafunzo haya kwa vijana, ni muhimu sana kwa ajili ya kuongeza kipato kwa njia ya kilimo cha kibiashara…tumekuwa shamba darasa wazuri kwa wakulima na wadau wa kilimo 150, wanaotembelea mradi,”alisema Emmaculatha.

Kutokana na mradi huo, Emmaculatha alibainisha kuwa, tangu waanze mavuno ya nyanya mwezi juni mwaka huu, zimepatikana kilo 1,420, sawa na tani 1.42, ambazo zimeingiza kiasi cha shilingi 1,420,00/=, hivyo kustawisha uchumi wa vijana.

WAZIRI wa nchi, ofisi ya Waziri mkuu, kazi, vijana na ajira, Profesa Joyce Ndelichako (wa pili kutoka kushoto), akipokea maelezo kuhusu mradi wa Kitalu nyumba, kutoka kwa katibu wa vijana, Emmaculatha Nkumbi (aliyesuka nywele), wakati Waziri huyo alipotembelea mradi huo.

KWA upande wake Waziri wa nchi, ofisi ya Waziri mkuu, kazi, vijana na ajira, profesa Joyce Ndelichako, alisema mradi wa kitalu nyumba nchini unatekelezwa kwa mikoa 17, kwa zaidi ya shilingi bilioni 5.3, huku halmashauri 117, zikinufaika hadi mwaka huu.

Profesa Ndalichako alisema kuwa, kupitia mradi wa kitalu nyumba, vijana wananufaika nao kiuchumi na mpaka sasa vijana 12,000 nchini wanatekelza program hiyo muhimu kwa mustakabali mzima wa uchumi na maisha yao ya baadaye.

Alitumia fursa hiyo kumsukuru Rais Samia Suluhu Hassan, kutenga fedha za kutosha, kwa ajili ya vijana, kwa kuongeza bajeti ya kilimo mara nne kwa mwaka ujao wa fedha, ikiwa ni zaidi ya mara nne, hali itayotoa fursa kwa vijana kujiajiri, kupitia kilimo.

“Kwa kweli program hii vijana wameifurahia sana na wameipokea kwa mikono miwili…namshukuru sana Rais wetu, Samia Suluhu Hassan, kuweza kutenga fedha zote hizi kwa ajili ya kuwasaidia na kuwakomboa vijana kiuchumi,”alisema Waziri.

Waziri Profesa Ndalichako alifafanua kuwa, mradi huo unawahusu vijana waliohitimu  elimu ya juu, kupitia vyuo vikuu mbalimbali, pia wale wenye kiwango cha elimu ya vyuo vya kati, kwa lengo la kuwawezesha wajiajiri kupitia sekta ya kilimo.

Wizara inategemea kuwa na miradi mingine zaidi kwa ajili ya kuwaendeleza vijana kiuchumi…. Program kwa ajil ya uwezesaji wa vijana na kuwaongezea ujuzi

 Hata hivyo Profesa Ndalichako alibainisha kuwa, kwa mwaka wa fedha wa 2022/2023, serikali imetenga zaidi ya shilingi bilioni tisa, kwa ajili ya kutekeleza program hii muhimu na maalumu, katika maeneo yanayofuga samaki, hususani mikoa ya ziwa Victoria.

KATIBU wa vijana, kupitia mradi wa Kitalu nyumba manispaa ya Singida, Emmaculatha Nkumbi (aliyesuka nywele), akitoa maelezo ya kilimo cha mbogamboga ndani ya Kitalu nyumba, kwa Waziri Profesa Ndalichako, aliyefanya ziara ya siku moja katika manispaa ya Singida.