MAPATO YA NDANI YANUFAISHA ZAIDI YA WATU 12,000, KATA YA MTIPA

Posted on: February 17th, 2023

WANANCHI 12,770 wa Kata ya Mtipa, katika Manispaa ya Singida, watanufaika na huduma bora za afya, baada ya ujenzi wa kituo kipya cha afya katika kata hiyo kukamilika.

Kaimu Mkurugenzi wa Manispaa ya Singida, Jeshi Lupembe, anasema mradi huo ulitengewa Tshs. Sh. Milioni 500 kupitia mapato ya ndani, na ukikamilika utakuwa mkombozi kwa wananchi, hasa wanawake wapatao 6,300  na watoto.

Hadi kufikia Desemba 2022, Tshs. 170,187,500 zilishatumika kwa ajili ya kutekeleza mradi huo, ambao kwa awamu ya kwanza umejikita katika ujenzi wa jengo la wagonjwa wa nje (OPD), jengo la maabara, na kichomea taka.

Jeshi amefafanua kuwa, pamoja na ujenzi kufikia katika hatua hiyo, tayari Manispaa imeshalipa fidia ya zaidi ya Tsh. 5,000,000 kwa Wananchi wane, waliotoa eneo kwa ajili ya ujenzi wa kituo hicho cha Afya.

Aidha Jeshi ameeleza baadhi ya shughuli zilizotekelezwa kwa kutumia fedha za mapato ya ndani kuwa ni, utoaji wa mikopo ya wanawake, vijana na watu wenye ulemavu, ambapo hadi kufikia Desemba mwaka jana (2022), vikundi 32 vimenufaika.

Shughuli zingine ni, ununuzi wa malori mawili ya kuzolea taka, ujenzi wa machinjio mpya eneo la Ng’aida na kutengeneza mtambo wa kuzolea taka, baada ya kuharibika na kuwa katika hali hiyo kwa muda mrefu, bila ya kufanya kazi.

Mapato hayo pia yamegharamia ununuzi wa gari jipya aina ya Toyota Land Cruiser, kwa ajili ya shughuli za manispaa, ukarati wa miundombinu ya Kituo kikuu cha Mabasi Misuna, ambacho ni chanzo kikuu cha mapato, kuboresha mazingira ya kufanyia kazi kwa watumishi, baada ya kununua viti 74 vya kukalia ukumbini na kwa ajili ya wakuu wa idara, na kununua madawati kwa shule ya sekondari Unyianga

Wakati huo huo Kaimu Mkurugenzi huyo, ametoa wito kwa Wanachi hakikisha wanalipa tozo, ushuru na leseni kwa wakati, ili kuiwezesha Manispaa kutoa huduma bora kwa wananchi wake kwa wakati.

Manispaa ya Singida ina jumla ya vituo vya kutolea huduma za afya 23,  vikiwemo 12 vya serikali na 11 vya sekta binafsi, huku Ujenzi unaoendelea katika mradi wa Kituo cha Afya Mtipa, hadi sasa umetoa ajira 20 kwa vijana, na wanawake watano.

.