MASHINDANO YA UMITASHUMTA MKOA WA SINGIDA YAZINDULIWA

Posted on: May 29th, 2024

MASHINDANO ya UMITASHUMTA, Mkoa wa Singida yamezinduliwa rasmi ikiwa ni sehemu ya maandalizi ya kusaka timu za mkoa kwa ajili ya mashindano hayo ya kitaifa ambayo yafanyika mwezi Juni, mwaka huu, mkoani Tabora.

Mashindano hayo yamezinduliwa leo, Mei 29, 2024 ngazi ya mkoa katika Viwanja vya Shule ya Sekondari Mwenge na ikishiriki Halmashuri zake saba ambazo Manispaa, Singida DC, Itigi, Manyoni,Mkalama,Ikungi na Iramba ambao wataunda timu moja kwa kila mchezo kwa ajili ya michuano ya kitaifa ya UMITASHUMTA na wanafunzi 840 wakishiriki mashindano hayo.

Lengo la mashindano haya ni kupata timu ambazo zitaweza kuiwakilisha Singida katika mashindano ya UMITASHUMTA Taifa mashindano ambayo yatafanyika Mkoa wa Tabora, Juni mwaka huu.Mashindano ya kuandaa timu za mkoa yameanza leo na yanatarajiwa kukamilika Mei 31, mwaka huu.

Afisa Michezo, Utamaduni na Sanaa wa Mkoa wa Singida, Amani Mwaipaja amesema kuwa kwasasa wapo katika mchakato wa kusaka timu ambazo zitakwenda kuiwakilisha Singida katika michuano ya kitaifa ya UMITASHUMTA.

“Mashindano ya safari hii yanaonekana kuwa na hamasa licha ya kuwa ni siku yetu ya kwanza Watoto wanaonekana kufurahia na kuchangamka katika michezo mbalimbali ambayo inaendelea hapa. Lakini vipaji vinaonekana tumeangalia katika michezo tofauti ambayo imeanza kuchezwa hivyo tunaamini tutapata timu bora zaidi kuliko zile na mwaka uliopita na tutafanya vizuri kwani kuna vitu vimeongezeka.

“Lakini niwashukuru Wakurugenzi wa Halmashauri kwa kuwawezesha wanafunzi na walimu kufika kwenye mashindano hayo kama unavyofahamu michezo hii inahitaji fedha, ila wamepambana na kufanikisha hilo, tunaamini tutapata timu bora ambazo zitaiwakilisha Singida.”

Kwa upande wa Mkuu wa Divisheni ya Elimu ya Awali na Msingi wa Manispaa ya Singida, Omary Maje alisema: “Tumekuja kwa ajili ya mashindano ya UMITASHUMTA ngazi ya mkoa kutafuta timu bora ya Mkoa wa Singida tunaamini katika mashindano haya timu za Manispaa zitafanya vizuri.”

Hata hivyo, Afisa Michezo, Utamaduni na Sanaa wa Manispaa ya Singida, Samwel Mwaikenda alisema: “Sisi kama wenyeji tumejipanga vizuri, tunaamini kuwa mwaka huu kama Manispaa tutafanya vizuri na michezo yetu ya awali leo tumeanza vizuri hiyo dalili nzuri kwetu, lakini lengo ni kupata timu bora za mkoa.”