Mbio za mwenge wa uhuru zaanza mkoani Singida

Posted on: June 29th, 2017

MBIO za mwenge wa uhuru mwaka huu mkoani Singida zilizoanza tarehe 27/2017,zinatarajiwa kufungua,kuzindua,kuweka mawe ya msingi na kutembelea mirandi 45 mbalimbali ya maendeleo ya wananchi,yenye thamani ya zaidi ya shilingi bilioni 20.1.

Mwenge huo ulioanza mbio zake katika wilaya ya Manyoni mkoani Singida  ukitokea mkoani Dodoma,utafungua miradi 14,utazindua nane,mawe ya msingi 13 na utatembela kumi.

Akizungumza kwenye hafla ya makabidhiano ya mwenge huo yaliyofanyika jana kijiji cha Sanza,mkuu wa mkoa wa Singida,Dk.Rehema Nchimbi,alisema kati za fedha hizo,zaidi ya shilingi 6.2 bilioni,ni nguvu kazi ya   wananchi,halmashauri shilingi bilioni moja,serikali kuu bilioni 13.2 na wahisani shilingi bilioni moja.

Alitaja baadhi ya  miradi hiyo ni ya kutoka  sekta ya ufugaji,mazingira,maji,afya,elimu,barabara,utawala bora,kilimo,ushirika,biashara,ardhi na programu za mapambano dhidi ya madawa ya kulevya.

Aidha,,makabidhianao hayo,yalitumika pia kuzindua dawati la sekta binafsi ambalo litakuwa chini ya uratibu wa maafisa maendeleo ya jamii.

“Dawati litatambua kwa takwimu,mahali,aina ya shughuli na hali ya uzalishaji,ili kuhakikisha ushiriki mtambuka unaowajibika ipasavyo ikiwemo kutoa taarifa ya soko la mazao mbalimbali.Lengo ni kurahisisha uwekezaji mkoani kwetu”,alisema Dk.Nchimbi.

 Kwa upande wake kiongozi wa mbio za mwenge mwaka huu,Amour Hamad Amour,amesema kuwa amefurahishwa na wilaya ya Manyoni,kuwa mstari wa mbele katika kuhakikisha dhana ya Tanzania ya viwanda imeanza kutekelezwa kwa vitendo.

Alisema mradi wa ushonaji nguo na wa ufugaji nyuki kibiashara,ina viashiria vya wazi kuwa halmashauri ya Manyoni,itakuwa ya viwanda vidogo,vya kati na hata vikubwa, mbele ya safari.

“Nitumie fursa hii kuwaomba maafisa wa maendeleo ya jamii,wahakikishe vikundi vya wanawake na vijana,wanapatiwa mikopo kutoka asilimia tano ya mapato ya ndani ya halmashauiri,ili viweze kupata nguvu ya kuanzisha viwanda vidongo.Msiishie hapo,wapeni na mafunzo mbalimbali ya ufugaji nyuki,kuku na mifugo kibiashara”,alisema Amour na kuongeza;

“Na hawa akina mama waliojiunga kwenye kikundi cha ushonaji,wapewe mafunzo ya kuboresha shughuli zao ziweze kwenda na wakati”.

Mbio za mwenge wa uhuru tarehe 28/6/2017 zinatarajiwa kuendelea katika halmashauri ya Itigi,na  juni 29,mwaka huu,utakimbizwa wilaya ya Singida.