MEYA ATOA NENO, AIPONGEZA MANISPAA

Posted on: February 8th, 2024

Mstahiki Meya Yagi Maulid Kiaratu , amesema mafanikio yaliyopatikana katika Manispaa ya Singida ni matokeo ya ushirikiano baina ya viongozi kuanzia ngazi ya mkoa, wilaya na halmashauri  pamoja na wananchi kwa ujumla ambao wana mwamko mkubwa wa maendeleo.

Amesema Halmashauri yake imesimamia vyema suala zima la ukusanyaji mapato jambo ambalo limeiwezezesha Manispaa hiyo kuvuka lengo na kuweza kupanda kibajeti.

“Kazi ya kukusanya mapato isingekuwa rahisi kama  sio kupitia ushirikiano uliopo baina ya viongozi ngazi ya mkoa wilaya,Madiwani, mkurugenzi, wataalam na watendaji wa kata… kwa kipindi kilichobaki tuende tukasimame na kukusanya mapato kwa bidii katika kata zetu” amesema Mhe.Kiaratu

Kiaratu ameendelea  kuwahimiza wataalam na waheshimiwa madiwani kujituma zaidi katika kusimamia ukusanyaji wa mapato kwani bajeti ijayo 2024/2025  imejikita zaidi katika kutoa huduma kwa wananchi na kuboresha miundombinu ya kutolea huduma kama vile kukamilisha maboma ya shule za msingi na sekondari, ukamilishaji wa vituo vya afya na zahanati, ukamilishaji wa ofisi za watendaji wa kata na mitaa, kulipa stahiki za watumishi na madiwani pamoja na kulipa madeni .

Meya Kiaratu ametoa agizo kwa mkurugenzi na waheshimiwa madiwani la kuona namna bora ya kuwamotisha watendaji wa kata ili kuwatia nguvu ya kufanya kazi zaidi katika ukusanyaji wa mapato na  kwa moyo mmoja.

Aidha amewataka wakuu wa idara ambao ni walezi wa kata kuwa karibu na kata wanazozisimamia ili kubaini changamoto na kuzitatua kwa wakati ikiwa ni pamoja na usimamizi wa miradi inayoibuliwa na kutekelezwa na wananchi.