MEYA MANISPAA AWAPONGEZA WAFANYABIASHARA WA SOKO LA VITUNGUU

Posted on: February 24th, 2024

Mstahiki Meya wa Halmashauri ya Manispaa ya Singida, Yagi Kiaratu amewashukuru wafanyabiashara wa Soko la Vitunguu la Manispaa ya Singida kwa kusaidia kuchangia mapato kwa serikali na kukuza uchumi wa mtu mmojammoja.

Hayo yamesemwa, leo Februari, 24, 2024 kwenye uzinduzi wa msimu mpya wa vitunguu, katika Soko la Vitunguu, lililopo eneo la Misuna, Manispaa ya Singida.

Uzinduzi wa msimu mpya wa Soko la Vitunguu uliudhuriwa na viongozi mbalimbali serikali, chama, soko, wafanyabishara pamoja na wananchi.

 Meya alimshukuru Mwenyekiti wa Soko la Vitunguu, Idd Sale Mwanja kwa kazi kubwa ambayo amekuwa akifanya kwa kushirikiana na Manispaa ya Singida katika ukusanyaji wa mapato.

 “Nawashukuru kwa namna ambavyo mnatusaidia sisi kudhibiti mapato ya halmashauri. Mwenyekiti unaweza kuwa haujui, ila takwimu zako ambazo  unatunza zimekuwa zikitusaidia kujua hapa kuna nini na pale hivyo tukirudi kwa mkusanyaji wetu tunajua hapa tumepigwa au laa.

“Leo hii tunazindua msimu mpya wa vitunguu tunatakiwa kufahamu, hili ni soko la kimataifa kama wenzangu walivyosema linaunganisha watu wengi japo wengi wanaweza kujiuliza umataifa wake uko wapi? Lakini ukiangalia kitunguu cha Singida ni bora zaidi duniani ndiyo maana watu wanatoka nchini tofauti kama Congo, Kenya na nchi nyingine, ila tunataka kukipeleka huko Uarabuni na kitafika huko kama soko litakuwa na huduma bora, lugha nzuri na wateja wakajitokeza zaidi.

“Serikali ya awamu sita inatambua umuhimu wa masoko na ubora wake ndiyo maana Halmashauri ya Manispaa ya Singida imekuwa ikifanya marekebisho madogomadogo hapa na tulifanya hivyo sababu tulikuwa na mpango mkubwa na soko hili, mwaka huu tayari tumeanza mkakati wa kujenga soko la kimataifa hapa Misuna na washauri wa mradi wapo Singida tayari halmshauri imeelekeza inataka soko la namna gani.

“Soko litakuwa la kisasa na huduma zote za kijamii na kifedha zitapatikana barabara zote za kuzunguka soka hapa zitawekwa rami, ili hata wakigeni wakija wafurahie huduma.”