MEYA MANISPAA AWATAKA WANANCHI KUENDELEA KUTUNZA MAZINGIRA

Posted on: September 3rd, 2024

Mstahiki Meya wa Manispaa ya Singida, Mhe. Yagi Kiaratu, amesisitiza umuhimu wa kutunza mazingira kwa kuendeleza shughuli za usafi na upandaji miti.

Meya Kiaratu alitoa kauli hiyo leo mara baada ya kuhitimisha zoezi la usafi wa mazingira katika soko la Ipembe na upandaji wa miti katika barabara ya Karume.

Manispaa ya Singida, kwa kushirikiana na Shirika lisilo la kiserikali la Helvetas kupitia mradi wake wa SAUTI NA NAFASI, pamoja na wadau wengine, iliendesha zoezi hilo la usafi.

Katika tukio hilo, Meya Kiaratu alisema, "Leo tumefanya usafi, tumeokoa afya za wananchi. Kama tukiendelea kupanda na kutunza miti itakuwa rahisi kuwa na hali ya ukijani. Ukijani utapendezesha mji kisayansi, utaongeza usafi wa hewa, na miti itavuta mvua."

Meya Kiaratu aliongeza kuwa, "Manispaa ya Singida imekuwa mdau mkubwa katika kutunza mazingira, ndiyo maana tumekuwa tukipanda miti. Wananchi wa Manispaa tuboreshe suala la usafi; taka zisitupwe hovyo katika barabara wala mifereji. Hii itasaidia mji wetu kuwa msafi na kuvutia."

Kwa upande wake, Mkurugenzi wa Nchi wa Helvetas, Felix Banchman, alisema, "Zoezi hili limekuwa zuri na la pekee. Tunafurahia kuona zoezi hili linaendelea kwa pamoja, na tunatarajia kufanikisha mengi zaidi."

Kaimu Mkurugenzi wa Manispaa ya Singida, Christian Kasambala, alishukuru wadau na wananchi kwa kushiriki katika zoezi hilo na kuomba kuwa jitihada hizi ziendelee ili kuimarisha mazingira na usafi wa mji.