MIGOGORO YA MIPAKA ITAFUTIWE UFUMBUZI ILI WANANCHI WAWEZE KUPATA HUDUMA STAHIKI

Posted on: May 9th, 2024

Mstahiki Meya wa Manispaa ya Singida Yagi Kiaratu, ametaka migogoro ya ardhi na hasa ya mipaka katika maeneo ya ndani ya Manispaa na ile ya nje baina ya Manispaa na halmashauri jirani , itafutiwe ufumbuzi haraka ili wananchi waweze kupata huduma stahiki za kijamii.

Meya ametoa maelekezo hayo leo Mei 09, 2024 wakati akihitimisha Mkutano wa baraza la madiwani robo ya tatu ikiwa ni siku ya pili ya mkutano huo, uliofanyika katika ukumbi wa chuo cha ufundi VETA, Manispaa ya Singida. 

Mstahiki Meya amesema  tatizo la mipaka ya maeneo ya ndani ya Manispaa na ile ya nje inasababisha eneo lenye watu kukosa huduma kutokana na watu wake kuhesabiwa eneo lingine na kutoa agizo la migogoro hiyo kutatuliwa na kuwekwa  sawa kwa maana ya mipaka kubainishwa hasa katika kipindi hiki cha kuelekea  kwenye uchaguzi wa serikali za mitaa na hata uchaguzi mkuu.

“Tatizo la mipaka ya maeneo ya ndani ya manispaa na ile ya nje ambayo inapelekea eneo lenye watu kukosa huduma kutokana na watu wake kuhesabiwa eneo lingine. Tuliweke sawa hasa tunapokelekea kwenye uchaguzi wa serikali za mitaa na hata uchaguzi mkuu kwa mipaka kubainishwa” amesema Mhe. Kiaratu.

Mhe. Kiaratu amekiri pia kuwepo na changamoto ya wataalamu wa ardhi hasa wa fani ya upimaji, na kuahidi kuifikisha changamoto hiyo katika vikao vya kisheria ili kuweza kupata wataalam wa fani hiyo kwa ajira ya mkataba ( Vibarua) hivyo kupungaza na hata kuondokana na changamoto ya mipaka na ujenzi holela.