MIRADI YA MAENDELEO YAKAGULIWA, MAAGIZO YATOLEWA

Posted on: January 7th, 2026

Mkuu wa Idara ya Mipango na Uratibu wa Manispaa ya Singida, Christopher Ngonyani, ameongoza timu ya wataalamu kutembelea na kukagua utekelezaji wa miradi mbalimbali ya maendeleo, huku akisisitiza umuhimu wa kukamilishwa kwa miradi hiyo kwa ubora na kwa kuzingatia miongozo ya Serikali.

Katika ziara hiyo, Ngonyani alisema lengo la ukaguzi ni kuhakikisha fedha za umma zinatumika ipasavyo na miradi inakamilika kwa wakati uliopangwa ili wananchi wanufaike na huduma zinazokusudiwa.

Miradi iliyotembelewa ni pamoja na ukamilishaji wa maabara mbili katika Shule ya Sekondari Mughanga, zilizogharimu Sh milioni 60, pamoja na ukamilishaji wa maabara moja katika Shule ya Sekondari Mufumbu yenye gharama ya Sh milioni 30.

Pia timu hiyo ilikagua ujenzi wa matundu 10 ya vyoo katika Shule ya Sekondari Mitunduruni, mradi uliogharimu Sh milioni 22, pamoja na ukamilishaji wa mabweni mawili katika Shule ya Sekondari Mungumaji kwa gharama ya Sh milioni 40.

Kwa upande wa sekta ya afya, Ngonyani alitembelea ukamilishaji wa wodi ya wazazi katika Kituo cha Afya Sokoine, mradi wenye thamani ya Sh milioni 130, na ukamilishaji wa jingo la Mama na Mtoto  Zahanati ya Unyamikumbi kiasi cha mil.60 unaolenga kuboresha huduma za afya kwa mama na mtoto.

Aidha, alikagua ujenzi wa shule ya mkondo mmoja Unyamikumbi B, mradi uliogharimu Sh milioni 302.2, ambapo jumla ya madarasa saba yanajengwa ili kupunguza msongamano wa wanafunzi na kuboresha mazingira ya kujifunzia.

Ngonyani aliwataka wakandarasi na wasimamizi wa miradi hiyo kuzingatia viwango vilivyowekwa na Serikali.