MKOA WA SINGIDA WAADHIMISHA MUUNGANO KWA SHUGHULI ZA KIJAMII KATIKA MANISPAA YA SINGIDA

Posted on: April 26th, 2023

Halmashauri ya Manispaa ya Singida inajenga shule mbili Mpya kupitia Mradi wa BOOST ili kupunguza changamoto ya msongamano wa wanafunzi katika shule za Msingi MINGA na NYERERE ambazo zimekuwa na idadi kubwa ya wanafunzi na kusababisha msongamano mkubwa madarasani.

Katika kilele cha maadhimisho ya miaka 59 ya Muungano,  Mkoa wa Singida umeadhimisha siku hii kwa kufanya shughuli mbalimbali katika eneo la ujenzi wa shule mpya Minga ambazo zilijumuisha shughuli za uchimbaji Msingi, usafishaji eneo la ujenzi na upandaji Miti.

Mgeni Rasmi Mkuu wa Mkoa wa Singida Peter Serukamba  pamoja na viongozi mbalimbali wa Chama na serikali,viongozi wa dini na  taasisi mbalimbali za umma na binafsi, wameweza kushiriki shughuli hizo ikiwa ni moja ya njia ya kuuenzi Muungano kwa vitendo.

Mkuu wa mkoa amewaasa wananchi kutumia fursa zilizopo za kiuchumi, kisiasa na kijamii ambazo ni matokeo ya muungano.

Amesema  ni vyema wananchi wakatumia vyema fursa hizo katika kujiletea maendeleo.

Naye Mstahiki Meya wa Manispaa ya Singida Yagi Maulid Kiaratu, amesema Muungano wa Tanganyika na Zanzibar ni muungano pekee imara duniani na kwamba wananchi wana kila sababu ya kuulinda kwani una manufaa makubwa kwa taifa na hata mtu mmoja mmoja.

Mstahiki Meya ametoa mfano wa uwezeshaji kaya maskini kuwa ni moja ya manufaa ya Muungano kwani walengwa wa pande zote wananufaika na mpango huo bila kukwepa  manufaa ya mtu mmoja mmoja

Pamoja na shughuli  hizo , Mkuu wa Mkoa Peter Serikamba ameweza kuzindua  magari mawili mapya ya kubeba taka ambayo yamenunuliwa na Halmashauri ya Manispaa ya Singida kupitia fedha za mapato ya ndani ya Manispaa ambapo yamegharimu zaidi ya Tshs. 200.

Shughuli za Muungano katika Manispaa ya Singida zimeadhimishwa kwa kufanya shughuli zikiwemo kutembelea mradi wa njia ya chini kwa waenda kwa miguu, kuweka jiwe la msingi mradi wa ujenzi wa zahanati ya Isomia, Uzinduzi wa wiki ya kitaifa ya chanjo, upandaji miti pamoja na shughuli za usafi katika maeneo yote ya mji.