MKURUGENZI WA SINGIDA AWAPONGEZA VIONGOZI WAPYA WA SERIKALI ZA MITAA

Posted on: November 28th, 2024

Mkurugenzi wa Halmashauri ya Manispaa ya Singida, Bi. Joanfaith Kataraia, amewapongeza viongozi wapya wa Serikali za Mitaa na kuwaasa kutekeleza majukumu yao kwa ufanisi, ikiwa ni pamoja na kusimamia mapato, miradi ya maendeleo, na kuwa sauti ya wananchi kwa kusikiliza kero zao.

Kauli hiyo imetolewa leo, Novemba 28, 2024, wakati viongozi wapya wa Serikali za Mitaa kutoka Kata zote walioshinda kula kiapo katika Ukumbi wa Chuo cha Maendeleo (FDC), Manispaa ya Singida.

Viongozi hawa ni pamoja na wenyeviti wa mitaa, vijiji na vitongoji, pamoja na wajumbe mchanganyiko na wajumbe wanawake, ambao walipigiwa kura katika uchaguzi wa Serikali za Mitaa uliofanyika Novemba 27, 2024, kote nchini.

Bi. Kataraia aliwapongeza viongozi hao na kuwaasa kuzingatia majukumu yao muhimu katika utawala wa Serikali za Mitaa.

Alisisitiza kwamba viongozi hawa wanapaswa kuhakikisha mikutano ya kijamii inafanyika, kutekeleza miradi ya maendeleo, kusimamia mapato na matumizi, pamoja na kutatua migogoro mbalimbali, ikiwemo migogoro ya ardhi.

“Mtakuwa na jukumu kubwa la kuhakikisha miradi ya maendeleo inatekelezwa kwa ufanisi na mapato yanakusanywa na kutumika kwa manufaa ya wananchi. Lakini, ni muhimu kuhakikisha usalama na amani katika maeneo yenu, na kusimamia masuala ya afya, elimu, mazingira na usafi,” alisema Bi. Kataraia.

Pia, aliwakumbusha viongozi hao kuwa uchaguzi umemalizika, na kwamba ni wakati wa kuwahudumia wananchi bila kujali tofauti za kisiasa, kidini, au kijamii. Alisisitiza umuhimu wa viongozi hao kuwa mfano bora kwa jamii, kwa kuhakikisha demokrasia inajengwa na wananchi wanaunganishwa katika maendeleo.

“Tunawategemea nyinyi kuwa viongozi wa mfano, kuhakikisha kwamba mnafanya kazi kwa bidii na kwa manufaa ya wananchi wote. Msiache kumsaidia Mh. Rais (Dkt Samia Suluhu Hassan) na kuwaunga mkono wananchi katika juhudi za maendeleo,” alisisitiza Bi. Kataraia.