MKUU WA MKOA AISHAURI MANISPAA KUANDAA MIKAKATI ITAKAYOIMARISHA USAFI WA MJI WA SINGIDA

Posted on: January 20th, 2023

Halmashauri ya Manispaa ya Singida imeshauriwa kuandaa mikakati itakayoimarisha usafi wa mji, sambamba na ukusanyaji wa ada za taka, inakayotozwa kwa kila mwezi Sh. 2,000.

Mkuu wa Mkoa wa Singida Peter Serukamba, ametoa rai hiyo kwenye ziara ya siku moja, katika Manispaa ya Singida, wakati akikagua hali ya usafi na uzoaji wa taka, kwenye vizimba.

Serukamba amesema kuwa, Halmashauri ya Manispaa ya Singida, inalo jukumu kubwa kuhakikisha hali ya usafi inaimarika, ili kuondoa kero na hatari ya mji huo kupatwa na maradhi ya mlipuko.

“Hali ya usafi ya mji hairidhishi, hasa maeneo ya vizimba…hakikisheni mnadhibiti tatizo hili la taka, ili kuepuka magonjwa ya mlipuko,” alisema Serukamba.

Kadhalika Serukamba, ameitaka Manispaa ya Singida, kuandaa mkakati madhubuti utakaowezesha kila kaya kuchangia ipasavyo gharama za uzoaji taka, ili kuuwezesha mji kuwa safi.

“Tubadilike, umefika wakati kila mtu anazalisha taka lakini hachangii gharama ya kuziondoa…ni jukumu la kila mmoja kushiriki katika usafi kwa kuchangia gharama”, amesisitiza Serukamba

Katika hatua nyingine, Mkuu huyo wa Mkoa amemwagiza Kaimu  Mkurugenzi wa Manispaa, Jeshi Lupembe, kuhakikisha maeneo yote ya wazi, ambayo yanatumika kwa ajili ya kukusanyia taka (collection point) yanasafishwa na kupandwa miti ili kuboresha mazingira ya mji .

Kwa upande wake, Mkuu wa Wilaya ya Singida, Mhandisi Paskasi Muragili, amesema zoezi la usafi wa mji ni shirikishi, kati ya Watumishi wa sekta zote na wananchi kwa ujumla, kwa lengo la kuuweka mji wa Singida katika hali ya usafi.

“ Kila mmoja wetu kwa nafasi yake awajibike sana katika kuhakikisha Mji unakuwa safi…Watendaji wa Mitaa na Kata, mshrikiane kusimamia zoezi hili, kwenye maeneo yenu,” amesisitiza Muragili.

Pia Mkuu huyo wa Wilaya, ametumia fursa hiyo kuhimiza upandaji miti kwenye Kata na maeneo ambayo bado yako nyuma, katika kutekeleza zoezi hili na kuwataka Watendaji kuhakikisha wanafikia lengo la upandaji miti, ifikapo 30, Januari, 2023.

Naye Mstahiki Meya wa Manispaa ya Singida, Yagi Maulid Kiaratu, amewataka walezi wa Kata, kushirikiana vyema na Watendaji wa Kata wanazozilea, ili kufikia malengo ya ukusanyaji mapato na hasa ada za uzoaji wa taka, kwa asilimia kubwa

Kupitia ziara hiyo, Kaimu Mkurugenzi wa Manispaa ya Singida Jeshi Lupembe, alimshukuru Mkuu wa Mkoa, na akaahidi kusimamia vyema maelekezo yote aliyoagiza, ya usafi wa mji na ukusanyaji mapato.

Amesema kuwa, changamoto kubwa inayoikabili Manispaa ni uhaba wa magari ya uzoaji wa taka, pamoja na ubovu wa mtambo wa kuzoa taka.

Lupembe, amefafanua kuwa, ili kupunguza gharama ya uzoaji wa taka kutokana na gharama kubwa ya kukodi magari, Manispaa imejiwekea mkakati wa kununua malori mawili, kwa ajili ya kurahisisha kazi hiyo.