MKUU WA MKOA SINGIDA ATOA MAAGIZO USIMAMIZI WA MAPATO

Posted on: August 29th, 2024

Mkuu wa Mkoa wa Singida, Mhe. Halima Dendego, amewataka viongozi wa mkoa huo kusimamia kwa karibu vyanzo vyote vya mapato na kuhakikisha kuwa taratibu zote zinafuatwa kwa usahihi.

Akizungumza katika kikao kazi kilichofanyika Agosti 29, 2024, Dendego alisisitiza umuhimu wa nidhamu ya mapato na uwajibikaji katika ukusanyaji na matumizi ya rasilimali za umma.

Mhe. Dendego alibainisha kuwa ni muhimu kwa viongozi kuhakikisha vyanzo vya mapato vinatambuliwa, kusimamiwa, na kudhibitiwa ili kuzuia mianya ya upotevu wa fedha za umma.

"Kila kiongozi anawajibika kuhakikisha mapato yanakusanywa ipasavyo na hakuna upotevu wa aina yoyote. Ni jukumu letu kuhakikisha tunasimamia rasilimali hizi kwa uadilifu na kufuata taratibu zote za kisheria," alisisitiza.

Aidha, alionya dhidi ya vitendo vya rushwa na matumizi mabaya ya ofisi, akisema kwamba viongozi wanapaswa kuwa mfano bora kwa kufuata sheria na taratibu.

"Uwazi na uwajibikaji ni msingi wa mafanikio ya mkoa. Hakuna kiongozi anayepaswa kukiuka taratibu za ukusanyaji na matumizi ya mapato," alisema Dendego.

Mkuu wa Mkoa alihimiza pia viongozi kuwa wabunifu na kutafuta vyanzo vipya vya mapato ili kuongeza mapato ya mkoa na taifa kwa ujumla.

"Usimamizi mzuri wa vyanzo vya mapato utasaidia katika utekelezaji wa miradi ya maendeleo inayolenga kuboresha maisha ya wananchi wa Singida," aliongeza.

Mhe. Dendego amewataka viongozi wote kuhakikisha wanatekeleza wajibu wao kwa uadilifu, wakikusanya mapato yote na kupeleka benki kwa wakati, huku wakisisitiza umuhimu wa kufuata taratibu zote. @ikulu_mawasiliano zilizopo bila kuzipindisha.