MSTAHIKI MEYA APONGEZA USIMAMIZI MZURI WA MIRADI

Posted on: November 14th, 2023

Halmshauri ya Manispaa ya Singida imepongezwa kwa usimamizi mzuri wa miradi hali iliyowezesha kukamilika kwa miradi kwa viwango vyenye ubora.

Mstahiki Meya wa Manispaa ya Singida, Yagi Kiaratu ametoa pongezi hizo kwa Mkurugenzi wa Manispaa ya Singida, Jeshi Lupembe na Wakuu wa Idara na Vitengo katika Mkutano wa Baraza Madiwani robo ya tatu katika siku yake ya pili, uliofanyika katika ukumbi wa Maktaba wa Shule ya Sekondari ya Mwenge.

“Manispaa imepiga hatua kwa kiasi kikubwa hasa katika kusimamia Miradi ya maendeleo” amesema Mstahiki Meya na kuwasisitiza Wakuu wa Idara na Vitengo kusimamia vyema vyanzo ya mapato.

Amesema malengo ya Halmshauri ni kuona inakamilisha miradi viporo yote na kuongeza kuwa mpaka sasa Halmashauri imeweza kukamilisha Zahanati 03 kwa kiwango chenye ubora na zimeanza kufanya kazi baada yakupatiwa watumishi.

 Amesema shughuli ya ukamilishaji ujenzi wa vituo vya afya unaendelea pamoja na miradi mingine ya maendeleo iliyoanzishwa kwa nguvu za wananchi.

 Pamoja na miradi, Mhe. Kiaratu amewakata Wakuu wa Idara na Vitengo wanaosimamia vyanzo vya mapato kuhakikisha vyanzo hivyo vinakusanya kulingana na malengo yaliyokusudiwa ili kuiwezesha Manispaa hiyo kupeleka fedha katika miradi ya maendeleo lakini pia kuweza kujiendesha.