NAIBU MEYA: SIMAMIENI VYEMA FEDHA ZA UJENZI WA VYUMBA VYA MADARASA

Posted on: November 26th, 2022

Naibu Meya wa Manispaa ya Singida, Hassan Mkata, amewataka Madiwani na viongozi wengine wa Umma, kusimamia vema fedha za ujenzi wa vyumba vya madarasa, ili yaweze kutumiwa na wanafunzi watakaojiunga na kidato cha kwanza, ifikapo Januari mwakani (2023).

Naibu Meya huyo amesema hayo kwenye Mkutano wa kawaida wa Baraza la Madiwani, uliofanyika kwenye ukumbi wa Shule ya Sekondari Mwenge mjini Singida, pamoja na mambo mengine kupokea taarifa ya robo ya kwanza ya mwaka, kwa ajili ya utekelezaji miradi ya maendeleo.

Amesema, Manispaa ya Singida imepokea fedha za ujenzi wa vyumba hamsini vya madarasa ya shule za Sekondari, na yanatakiwa kukamilika ifikapo desemba 15 Mwaka huu, hivyo ni jukumu lao wote kushirikiana ili kukamilisha kazi hiyo.

”Kutokana na Serikali kutupatia fedha za ujenzi wa vyumba vya madarasa kwa wanafunzi watakaojiunga na kidato cha kwanza januari mwakani, sote tuna wajibu wa kusimamia kwa karibu, ili yakamilike kwa wakati,” alisema Naibu Meya.

Aidha katika hatua nyingine Madiwani hao wamemwomba Wakala wa Barabara, Mijini na Vijijini (TARURA), kuongeza bidii ya kutengenza, kufungua na kukarabati barabara kwenye maeneo mbalimbali ya Manispaa, ili kumaliza kero kwa jamii, hususani kuelekea kipindi  hiki cha mvua za masika.

Baadhi ya Madiwani hao akiwemo, Kawawa Munjoli, Hamisi Kinyeto na Ibrahim Murua, na Magreth Malecela pamoja na kupongeza kazi nzuri inayofanywa na TARURA, lakini wametaka umakini zaidi katika matengenzo, pia itanue wigo wa shughuli zake, lengo likiwa ni kuwezesha barabara zote kupitika wote.

Meneja wa TARURA Wilaya ya Singida, Mhandisi Lambert Bayona, amesema mwaka wa fedha 2022/2023, Serikali imetenga zaidi ya Sh. Bilioni 2.25, kwa ajili ya kutekeleza shughuli mbalimbali za matengenezo ya barabara, katika Manispaa ya Singida.

Mhandisi Bayona amefafanua kuwa kati ya fedha hizo, Sh. Milioni 500/- zimetokana na Tozo, zaidi ya Sh. Bilioni 1.25/- zitatoka kwenye Mfuko wa Barabara na fedha zingine Sh. Milioni 500/-, zikiwa ni fedha za kila Jimbo.

Kaimu Mkurugenzi wa Manispaa ya Singida Jeshi Lupembe, akijibu maswali ya papo kwa papo katika Mkutano wa Baraza la Madiwani wa robo ya kwanza.

Mwenye kiti wa Chama cha Mapinduzi , Lucia Mwiru, akizungumza kwenye mkutano wa baraza la madiwani wa robo ya kwanza

Wajumbe wa Baraza la Madiwani wakiwa wamesimama tayari kwa ajili ya dua kabla ya Mkutano wa Baraza la Madiwani wa robo ya kwanza kufunguliwa

Waheshimiwa madiwani  Hamis Kisuke ( Misuna), Emanuel Emadaki (Mwankoko) na Ibrahimu Mruwa (Minga) wakichangia hoja baada ya mawasilisho ya utekelezaji wa shughuli za maendeleo za  taasisi za Umma zikiwemo TARURA, SUASA na TANESCO kwenye mkutano wa Baraza la Madiwani robo ya kwanza