NAIBU WAZIRI TAMISEMI ARIDHISHWA NA UTEKELEZAJI WA MIRADI YA BOOST MANISPAA YA SINGIDA

Posted on: June 16th, 2023

Manispaa ya singida imepongezwa kwa kasi nzuri ya utekelezaji wa miradi ya ujenzi wa vyumba vya madarasa kupitia mradi wa BOOST ambayo ni matokeo ya usimamizi mzuri na shirikishi.

Naibu Waziri wa TAMISEMI Deogratius  Ndejembi amesema hayo leo tarehe 16 Juni 2023 baada ya kutembelea baadhi  miradi hiyo na kuridhishwa na kasi ya utekelezaji wake.

Miradi iloyotembelewa nI ujenzi wa shule mpya ya msingi Minga, ujenzi wa shule mpya ya msingi Nyerere na ujenzi wa vyumba 03 vya madarasa na vyoo matundu 03 katika shule ya msingi Mwaja

Aidha Ndejembi ameagiza kuongezwa kwa kasi katika miradi mingine ili kuwezesha kukamilika kwa wakati na kwa kufanya hivyo kutaiweka Manispaa ya Singida katika nafasi nzuri ya kupatiwa fedha za kutekeleza miradi mingine.

Naibu Waziri Ndejembi ametoa agizo la kuhakikisha viwanja vya michezo haviguswi wakati wa kuchagua eneo la utekelezaji wa mradi “viwanja vya michezo visiguswe wakati wa uchaguzi wa eneo la ujenzi wa vyumba vya madarasa, michezo ni afya kwa watoto na ni muhimu katika ukuaji wao “, amesema Ndejembi.

Ndejembi amesema pia kuwa fedha zaidi shilingi milioni 570 zinatarajiwa kuletwa kwa ajili ya miradi ya ujenzi wa shule.

Naye Mkuu wa Wilaya ya Singida Mhandisi Paskas Muragili ametumia fursa hiyo kumkumbusha ahadi aliyotoa Waziri Ummy Mwalimu wakiti akiwa waziri wa TAMISEMI juu ya ujenzi wa vyumba vya madarasa vya shule ya sekondari Utemini vilivyoathiriwa na nyufa kubwa na kuhatarisha maisha ya wanafunzi na walimu. Shule ya sekondari utemini ni moja ya shule za sekondari za kata katika Manispaa ya Singida ambayo kutokana na athari ya nyufa imelazimika kufungwa ili kuepuka maafa ambayo yangeweza kutokea na kuathiri wanafunzi na walimu hivyo wanafunzi wake kupelekwa shule za jirani kwa muda.

Naye Mstahiki Meya wa Manispaa ya Singida, Yagi Maulid Kiaratu amemuahidi naibu waziri huyo kuwa Halmashauri yake itasimamia kikamilifu miradi yote iliyoletwa na itakayoletwa na kuhakikisha inatekelezwa kwa kiwango kinachotakiwa na kukamilika kwa wakati.

Manispaa ya Singida kwa mwaka fedha 2022/2023 imepokea zaidi ya shilingi bilioni 1.3 kwa ajili ya ujenzi wa miundombinunya shule za msingi kupitia mradi wa BOOST na zaidi ya shilingi milioni 380 kupitia serikali kuu.