OSCAR MWAKALOBO: MUUGUZI, MWELIMISHAJI JAMII NA MSIMAMIZI WA MRADI, ATWAA TUZO YA MWEZI

Posted on: November 16th, 2022

Manispaa ya Singida imeendelea kuhamasisha utendaji kazi sehemu  za kazi ili kuweza  kupata matokeo chanya yatakayoinufaisha  serikali katika mipango yake ya maendeleo.

Hali hii imetokana na utaratibu ulioanzishwa na Manispaa ya Singida, wa kushindanisha watumishi kwenye idara na vitengo vyake vyote, kwa lengo la kuleta tija na ufanisi katika eneo la kazi.

Akizungumza kwenye hafla ya kumtangaza mtumishi Hodari wa mwezi Oktoba Bw. Oscar Laiton Mwakalobo, Mkuu wa Idara ya Utumishi na Utawala Manispaa ya Singida, Kulanga Matiya Kanyanga, amesema  Mchakato huo ni moja ya mikakakati iliyobuniwa kwa lengo la kuamsha ari ya utendaji kazi kwa watumishi.

Amesema kuwa, jambo la kuwamotisha watumishi linajenga uhusiano mwema, ushirikiano, kujiamnini na kuaminiwa  kati ya mwajiri na mwajiriwa, hivyo kuiwezesha Manispaa kufikia malengo yake, ya maendeleo kwa jamii

Kulanga amefafanua kuwa, zoezi hilo limeboreshwa baada ya kupokea maoni kutoka kwa wadau na ofisi kuyafanyia kazi, ikiwemo kuunda timu ya watu nane inayojumuisha wakuu wa idara wachache, baadhi ya watumishi na viongozi wa vyama vya wafanyakazi.

Naye Kaimu Mkurugenzi wa Manispaa ya Singida Aristideus Mulokozi, ametumia fursa hiyo kumpongeza mtumishi Hodari kwa mwezi Oktoba, na akatoa rai kwa watumishi wengine kufanya kazi kwa biddi na weledi ili kuiletea maendeleo Manispaa.

Kupitia fursa hiyo, Mulokozi amemwagiza Mkuu wa Idara ya Utumishi na Utawala, kuboresha kifungu cha motisha, wakati wa mapitio, ya nusu mwaka ya bajeti ya mwaka wa fedha 2022/2023, hali itakayoongeza gthamani ya utumishi.

“ Pamoja na pongezi hizi, nimwagize mkuu wa idara ya utumishi na utawala, ahakikishe kipindi cha budget review, anaboresha kifungu cha motisha ili mtumishi Hodari wa kila mwezi aweze kupewa zawadi bora, itakayoongeza thamani ya utumishi wake,” amesema Mulokozi.

Kwa upande wake Kaimu Katibu wa Chama Cha Wafanyakazi wa Serikali za Mitaa (TALGWU) mkoa wa Singida Bi. Juliana Muhinjo, amesema uongozi wa chama unaipongeza Manispaa kwa ubunifu huo, ambao unajenga ari ya uwajibikaji.

Amesema kuwa, TALGWU, itakuwa bega kwa bega katika kutekeleza mpango huo, huku akihidi kukamilisha taratibu za kuzawadia watumishi hodari, kwa ajili ya kuunga mkono zoezi hilo linalotekelezwa na Manispaa ya Singida.

Kaimu mganga mkuu wa Manispaa Dk.Hamisi Juma Yuna, amesema mtumishi Hodari wa mwezi Oktoba, anayetoka katika idara ya afya Bw. Oscar Mwakalobo, ameshinda kwa haki, kutokana na juhudi binafsi katika kuitumikia jamii.

Amesema kuwa, Mwakalobo ni Muuguzi, lakini pia analo jukumu la kusimamia mradi wa ujenzi wa majengo ya mama na mtoto na lile la upasuaji, kazi aliyoifanya vizuri, na kuwaridhisha wakaguzi wa mradi wanaofika kituoni hapo.

“ Oscar ni muuguzi kwa taaluma, hajawahi kuwa mhandisi wala mtunza hesabu, lakini amesimamia mradi wa jengo la mama na mtoto na lile la upasuaji, huku pia akitekelezwa majukumu yake ya uuguzi kwa ufanisi”, amesema Dk. Yuna.

Akiushukuru Uongozi wa Manispaa, Mwakalobo, ameahidi kuongeza juhudi zaidi kazini, ili kulinda heshima na tuzo aliyoipata, kwa lengo la kuiletea maendeleo jamii ya kata ya Mtamaa, Manispaa ya Singida na Taifa kwa ujumla.

Amewataka watumishi wengine kujituma kazini bila kujali nafasi zao “ Mimi ni muuguzi, lakini nasimamia pia mradi wa ujenzi  na naelimisha jamii kwa ajili ya kujiunga na mfuko wa afya ya jamii CHF, ambao kwa mwezi Oktoba, nimeweza kufikisha asilimia 60% ya uandikishaji,” ameeleza Mwakalobo

Halmashauri ya Manispaa ya Singida imeazisha programu ya kuwamotisha watumishi hodari kila mwezi katika mwaka wa fedha 2022/2023, huku mshindi wa kwanza katika program hiyo akiwa Bi. Bahati Samwaja kwa mwezi Septemba, ikihusisha jumla ya watumishi 1,546, waliopo sasa.