PELEKENI WATOTO KUPATA CHANJO YA SURUA NA RUBELLA”DC MURAGILI

Posted on: February 12th, 2024

kuu wa Wilaya ya Singida, Mhandisi Paskasi Muragili amewataka wananchi Manispaa ya Singida kujitokeza kuwapeleka watoto kupata chanjo ya surua na rubella inayotarajia kutolewa kupitia kampeni ya chanjo hiyo ambayo itaanza tarehe 15-18 Februari, 2024.

Wito huo umetolewa na Mkuu huyo wa wilaya baada ya kupokea taarifa ya chanjo katika kikao cha Kamati huduma za afya ya msingi Manispaa ya Singida kilichofanyika katika Ukumbi wa Manispaa Singida.

Mhandisi Muragili amewataka wananchi kuondokana na dhana potofu juu ya kampeni ya chanjo ya surua na rubella na kusema tayari maambukizi ya ugonjwa huo yameanza kuonekana miongoni mwa jamii hivyo kuwataka wananchi kuchukua hatua mara moja wanapoona dalili za ugonjwa huo.

Akiwasilisha taarifa hiyo ya chanjo, Mratibu wa chanjo Manispaa Bi. Digna Sakaya amesema walengwa wa chanjo hiyo ni watoto wote wenye umri kuanzia miezi 9 hadi miezi 59 (umri wa chini ya miaka 5).

“Watoto wote wenye umri kuanzia miezi 9 hadi miezi 59 ( wenye umri wa chini ya miaka 5), wafike haijalishi hata kama amepata tayari chanjo hiyo”, amesisitiza Bi.Sakaya.

Amesema chanjo hiyo haina madhara hata kama itarudiwa kwa mara ya pili kwani inakwenda kuimarisha zaidi kinga ya mtoto dhidi ya ugonjwa wa surua na rubella.

Bi. Sakaya amezitaja dalili za surua kuwa ni homa, mafua, kikohozi , macho kuwa mekundu na kutokwa na vipele vidogo vidogo kwenye paji la uso na kuwataka wananchi wenye watoto ambao wanadalili hizo kuwafikisha mara moja katika vituo vya kutolea huduma.

Kwa mujibu wa mratibu huyo wa Chanjo, tayari vituo vya kutolea huduma hiyo vimeandaliwa ambavyo ni pamoja na vituo vya kutolea huduma za afya, kliniki za mkoba, kliniki tembezi na vituo vya muda vitakavyoundwa.