RC DENDEGO APONGEZA WANAWAKE WALIOJITOKEZA KUGOMBEA NAFASI ZA UONGOZI SERIKALI ZA MITAA MKOANI SINGIDA.

Posted on: December 1st, 2024

Mkuu wa Mkoa wa Singida Mhe. Halima Dendego, ametoa pongezi kwa wanawake wote wa mkoa wa Singida waliojitokeza kugombea nafasi mbalimbali za uongozi na kushinda katika uchaguzi wa Serikali za Mtaa uliofanyika tarehe 27 Novemba 2024.

Mhe. Dendego ametoa pongezi hizo Desemba Mosi, 2024 katika sherehe ya kumkaribisha Mkoani Singida iliyo andaliwa na wanawake wa mkoa wa Singida kupitia umoja wao unaojulikana kama Wanawake Lakimoja.

Amesema wanawake ni taifa kubwa na kiungo chenye kutegemewa kwenye familia na hata jamii ambaye ametajwa hata katika vitabu vya dini hivyo kuwataka kuendelea kujiamini.

Amewataka wanawake kutokatishwa tamaa kwa maneno ya kejeli na badala yake wasonge mbele ili kufikia maendeleo kusudiwa.

Dendego ameahidi kuwashika mkono wanawake katika kujiletea maendeleo kwenye nyanja mbalimbali ambazo amezitaja kuwa ni kilimo, biashara na viwanda.

RC Dendego ambaye amepewa jina la aliyekuwa Chifu mwanamke wa kabila la kinyaturu aliyejulikana kwa jina la Liti, ameahidi kufanya mapinduzi makubwa ya maendeleo kupitia wanawake.

Wanawake wa mkoa wa Singida wamemfananisha na Chifu Liti kutokana na maono makubwa ya kimaendeleo aliyonayo, ushupavu, ujasiri na upendo hasa kwa wanawake .

"Wanawake tubebane, tupendane tufikie pale tunapohitaji kufika kimaendeleo" amesisitiza Dendego.

Sherehe ya kumkaribisha Mhe. Mkuu wa mkoa, Halima Dendego (Liti), zilitanguliwa na burudani mbalimbali zikiwemo ngoma za asili hasa katika zoezi la kumvisha mkuu huyo wa Mkoa vazi la asili za kabila la kinyaturu