RC DENDEGO AWAPONGEZA MADIWANI MANISPAA YA SINGIDA ATAKA HALMASHAURI KUWA YA MFANO

Posted on: June 14th, 2025

Mkuu wa Mkoa wa Singida, Mhe. Halima Dendego, amewapongeza Waheshimiwa Madiwani wa Halmashauri ya Manispaa ya Singida kwa kazi nzuri wanayoifanya licha ya changamoto chache zilizopo, huku akiwataka wataalamu kuhakikisha hoja za ukaguzi hazizidi katika halmashauri hiyo.

Mhe. Dendego alitoa pongezi hizo leo Juni 14, 2025, wakati wa Baraza la Kujadili Hoja za Mdhibiti na Mkaguzi Mkuu wa Hesabu za Serikali (CAG), lililofanyika katika Ukumbi wa Polisi Makao Makuu, Manispaa ya Singida. Baraza hilo lililenga kupitia, kupima mapato na matumizi ya fedha pamoja na utendaji wa halmashauri kwa ujumla.

Katika taarifa ya CAG, Manispaa ya Singida ilipata hati safi na kubakiwa na hoja 17, ambapo tano kati ya hizo ni za kisera na 12 zipo katika hatua mbalimbali za utekelezaji.

Akizungumza kwenye baraza hilo, Mhe. Dendego alisema kuwa licha ya changamoto zilizopo, madiwani wamekuwa wakitimiza majukumu yao ipasavyo katika kata zao na wanastahili pongezi kwa kujituma na kuonyesha uongozi makini.

“Changamoto zipo na hazitishi, ila Waheshimiwa Madiwani mko vizuri. Mnahitaji sehemu ndogo tu kumalizia, na mkimalizia hiyo basi Halmashauri ya Singida itaendelea kung’ara kama halmashauri nyingine nchini,” alisema Dendego.

Aidha, Mkuu huyo wa Mkoa alisisitiza kuwa hapendi kuona halmashauri inakuwa na hoja nyingi za ukaguzi, akiwataka viongozi na watendaji wa Manispaa hiyo kuwa mfano wa kuigwa katika halmashauri za mkoa huu, kwa kufanya kazi kwa bidii, uadilifu na kwa kuzingatia sheria.