RC SINGIDA AAGIZA MADEREVA BAJAJI NA PIKIPIKI KUSAIDIWA KUANZISHA SACCOS.

Posted on: April 25th, 2024

Mkuu wa Mkoa wa Singida Mhe. Halima Dendego,amemwagiza Mkurugenzi wa Manispaa ya Singida kukaa na Viongozi wa Madereva Pikipiki na Bajaji wa Halmashauri ya hiyo ili kuona njia bora ya kuwasaidia kuanzisha chama cha kuweka na kukopa (SACCOS) ambacho kitawasaidia kukopa fedha kwa ajili ya kununua vyombo vyao vya usafiri badala ya kuendesha vya watu hali ambayo itawasaidia kuboresha maisha yao.

Amesema kwa sasa chama chao kina wanachama zaidi ya 4,000 hivyo wanaweza kukopeshwa na kurejesha mikopo yao kwa haraka kama Watendaji watawasaidia kuanzisha SACCOS yao.

Dendego, ametoa agizo hilo (leo Aprili 25, 2024) kwenye Mkutano wake na Madereva wa Bodaboda na Bajaji katika Viwanja vya Bombadia kwa ajili ya kusikiliza kero zinazowakabili madereva hao na kuzitafutia ufumbuzi.

“Wakianzisha SACCOS yao wapelekeeni milioni 200 waweze kukopeshana wao kwa wao kwa sababu wanajua na ulipaji wao utakuwa ni rahisi kuliko kukopesha makundi mengine ambayo hayaeleweki kwani watajiimarisha kiuchumi kwa kununua vyombo vyao vya usafiri kwa sababu kazi wanaiweza” amesisitiza RC Dendego.

Aidha Mkuu wa Mkoa Dendego amepiga marufuku madereva wa bajaji na pikipiki katika Manispaa ya Singida kulipa tozo yoyote bila kupewa risiti na mtu anayetoza tozo hizo kwakuwa ni kinyume na utaratibu wa Serikali.

Amewataka watendaji wanaokusanya ushuru kuhakikisha wanatoka risiti Kwa waendesha bajaji na pikipiki na kuongeza kuwa ni jambo la aibu kwa Watendaji hao wanaokusanya mapato ya Serikali kushindwa kutoa risiti wakati msisitizo mkubwa wa Serikali ni kuwa malipo halali ya aina yoyote lazima mnunuzi apewe risiti ili Serikali ipate mapato kwa ajili ya kutekeleza miradi ya maendeleo.

“Haiwezekani kwa Serikali tuwe wa kwanza kutotoa risiti hilo halipo na haitawezekana tunataka haki bini haki, Mkurugenzi wa Manispaa ya Singida ukakae na Mzabuni ili muweke utaribu wa kutoa risiti kama Serikali inavyoelekeza”. RC Dendego