RC SINGIDA AAHIDI KUWALINDA WAKULIMA NA WAFANYABIASHARA WA VITUNGUU

Posted on: May 11th, 2023

Mkuu wa mkoa wa Singida Peter Serukamba, ameahidi kuwalinda wakulima wa vitunguu mkoani Singida ili kuhakikisha bidhaa zao zinafikishwa sokoni ili kupata soko la uhakika na kwa thamani halisi.

Serukamba amesema hayo katika mkutano wake na wakulima pamoja na wafanyabiashara wa Soko la Vitunguu Singida ambapo pia aliwaagiza wakala wa vipimo kuhakikisha kipimo cha kifungashio cha vitunguu kinachopimwa Singida ndio kipimo kitakachotumika katika masoko yote ya vitunguukulingana na maelekezo ya serikali ili kuondoa utofauti.

Katika mkutano huo Serukamba amewaagiza  wakuu wa wilaya na wakurugenzi wa halmashauri za mkoa wa Singida kuhakikisha kuwa mzigo wa vitunguu uliotoka katika masoko ya Singida hautashikiliwa  katika kizuizi chochocte ndani ya mkoa wa Singida.

“ hili ni la kwetu, sitarajii kusikia mtu amekamatwa kintinku, manyoni, itigi hapana… nitawaita ma-DC wote na wakurugenzi tuweze kutoa tamko mahususi” amesisitiza Serukamba.

Mkuu wa Mkoa wa Singida alifanya ziara ya kushtukiza katika soko hilo ili kujionea hali halisi ya biashara pamoja na usafi lakini pia kusikiliza kero za wakulima na wafanyabiashara, ambapo kilio kikubwa kilielekezwa katika Ushuru wa mazo katika vizuizi barabarani ambavyo vimeelezwa kuchangia katika kumkosesha soko la uhakikia mkulima kwa kuuza mazao shambani kwa bei ya hasara.

Kwa upande wao wafanyabiashara wamewasilisha kilio chao kwa Mkuu wa Mkoa Serukamba kuhusu vizuizi  vya barabarani kushindwa kutambua ujazo wa vifungashio vya vitunguu kutoka Singida ambavyo ni kwa mujibu wa  maelekezo ya serikali na hivyo kutozwa fedha zaidi.