RC SINGIDA AFUNGUA KLINIKI YA UTATUZI WA KERO ZA WALIMU MKOA WA SINGIDA

Posted on: February 12th, 2025

Mkuu wa Mkoa wa Singida, Mhe. Halima Dendego, amefungua Kliniki ya Utatuzi wa Kero za Walimu Mkoa wa Singida (Samia Teacher's Mobile Clinic), akiamini kuwa kutatuliwa kwa kero za walimu kutasaidia kuboresha mazingira yao ya kazi na kuongeza ubora katika ufundishaji.

Kliniki hiyo imefunguliwa leo, Februari 12, 2025, katika Ukumbi wa Mabula Social Hall, Manispaa ya Singida, na inatarajiwa kutoa suluhu kwa changamoto zinazowakabili walimu katika mkoa huo.

Kliniki hii imeratibiwa na Chama cha Walimu Tanzania kwa kushirikiana na Ofisi ya Rais, Utumishi, Ofisi ya Rais Tawala za Mikoa na Serikali za Mitaa, Wizara ya Elimu, Sayansi na Teknolojia, pamoja na Tume ya Utumishi wa Walimu.

Lengo kuu la kliniki hiyo ni kutatua kero za walimu na kuboresha mazingira yao ya kazi na Walimu wenye kero kutoka Halmashauri saba za Mkoa wa Singida (Manispaa, Singida DC, Makalam, Itigi, Manyoni, Iramba na Ikungi) wakihudhuria.

Akizungumza katika ufunguzi huo, Mhe. Dendego alisisitiza kuwa lengo la kliniki ni kutatua changamoto mbalimbali zinazowakabili walimu na kuwataka waendelee kufanya kazi kwa bidii na kujitolea licha ya changamoto zinazowakabili. Alipongeza walimu kwa juhudi zao za kujituma katika ufundishaji.

“Walimu wetu mbali na changamoto walizonazo, bado wameendelea kufanya kazi nzuri, na mkoa wetu umeendelea kupata sifa katika sekta ya elimu.

"Leo tumekutana hapa kwa ajili ya kutatua kero zao, na lengo ni kuona walimu wangu wanafanya kazi kwa amani na utulivu,” alisema Mhe. Dendego.