RC SINGIDA AHIMIZA VIONGOZI MBALIMBI KUSHIRIKI KATIKA KUHAMASISHA WAZAZI JUU YA CHANJO YA SARATAINI YA MLANGO WA UZAZI..

Posted on: April 16th, 2024

Viongozi mbalimbali wenye ushawishi mkubwa katika jamii wametakiwa kuhamasisha wazazi kupelekea  watoto wao wa kike wenye umri kuanzia miaka 9 hadi 14 kupata chanjo ya saratani ya mlango wa uzazi.

Rai hiyo imetolewa jana Aprili 15, 2024 na Mkuu wa Mkoa wa Singida, Halima Dendego, wakati wa kikao cha uhabarisho kuhusiana na chanjo ya saratani ya mlango wa uzazi ngazi ya mkoa, kilichojumuisha wakuu wa wilaya, wakurugenzi wa halmashauri, viongozi wa dini, kamati ya usalama mkoa na wataalamu wa afya kutoka katika wilaya zote za mkoa wa Singida.

Amesema chanjo hiyo inayotolewa kwa mabinti wenye umri kuanzia miaka 9-14 inalenga kuwapa kinga watoto wa kike ya kuwakinga na ugonjwa huo hatari ambao kwa wanawake unaambukiza kirahisi kwa njia ya kujamiiana.

“…..tunajua jamii zetu zinamitazamo tofauti na tunaishi kwenye mila na desturi tofauti lakini katika hili lazima tuungane sote kwani madhara ya ugonjwa huu yanatuathiri wote bila kuangalia tofauti zetu” amesisitiza Dendego.

Dendego amewataka viongozi hao kutumia majukwaa yao kuwahamasisha wazazi  kuwapeleka mabinti zao wenye umri huo  katika vituo vya kutolea huduma vilivyoainishwa ili kupata chanjo hiyo ya saratani ya mlango wa uzazi.

Naye mratibu wa chanjo Mkoa wa Singida, Jadili Mhanginoma, amesema, utoaji wa chanjo hiyo unatarajia kuanza rasmi Aprili 22 hadi 26 mwaka huu na kwamba zoezi litaendelea hadi mwezi Desemba 2024 ili kuwafikia walengwa wote ambapo kwa mkoa wa singida Jumla ya wasichana 178,114 wanatarajiwa kuchanjwa chanjo hiyo.

Aidha wanginoma amesema jumla ya dozi 191,040 zimeshapokelewa na usambazaji kwenye halmashauri unaendelea