RC SINGIDA AIPONGEZA HALMASHAURI YA MANISPAA KWA KUPATA HATI SAFI NA KUVUKA LENGO LA UKUSANYAJI MAPATO

Posted on: June 26th, 2024

Mkuu wa mkoa wa Singida Mhe. Halima Dendego ameipongeza Halmashauri ya Manispaa ya Singida kwa kupata hati safi, lakini pia kwa ukusanyaji mzuri wa mapato ya ndani na kuifanya Manispaa kuvuka lengo kwa asilimia 100.

Dendego ameyasema hayo leo katika mkutano maalum wa Baraza la Madiwani la kujadili hoja za Mdhibiti na  Mkaguzi Mkuu wa hesabu za Serikali (CAG) uliofanyika katika Ukumbi wa Mwenge Sekondari, Manispaa ya Singida.

Dendego amesema kupitia taarifa zilizowasilishwa amepata darasa ya kuwa Halmashauri ya Manispaa ina malengo mazuri na kwamba fursa ya kukusanya mara mbili zaidi ipo wazi.

Aidha ameonesha furaha yake ya kukutana na madiwani wote na kusema ameona uchungu walionao kwa wananchi wanaowawakilisha na kwamba yeye na viongozi wenzake watahakikisha wanawajengea uwezo watendaji katika ngazi zote ili kuhakikisha wanawajibika ipasavyo.

Amewataka watumishi waliopo Manispaa kuona uwepo wao katika taasisi hiyo sio upendeleo bali wameaminiwa hivyo watimize wajibu wao kwa kusikiliza wanayoshauriwa na viongozi wao pamoja na kufanya kazi kulingana na taratibu, sheria na kanuni zinazowaongoza.

“Mapato mara mbili inawezekana endapo kila mmoja akichukuwa hatua katika eneo lake…”, amesisitiza RC Dendego.

Mkuu wa Mkoa ametumia fursa hiyo pia kuipongeza Ofisi ya Mdhibiti na Mkaguzi wa Hesabu za Serikali Mkoa wa Singida kwa kuwa mwalimu mzuri ambaye wakaguzi wake mekuwa wakitoa maelekezo kwa upendo hivyo kuwataka watendaji kutoiangusha ofisi hiyo kwa kutekeleza vyema maelekezo wanayopatiwa. 

Ameitaka halmashauri kuhakikisha ifikapo robo ya kwanza 2024/2025 iwe imekamilisha ujibuji wa hoja zote za nyuma na kuwataka wakuu wa idara na vitengo kuhakikisha hawazalishi hoja nje ya hoja za kisera,

“Natoa msisitizo wakuu wote wa Idara na vitendo hakuna kuzalisha hoja nje ya zile hoja za kisera…” amesisitiza Dendego.