SERIKALI YAAHIDI KUWASAIDIA WALEMAVU KUPATA ELIMU BORA

Posted on: February 22nd, 2024

SERIKALI imesema itaendelea kutoa sapoti kubwa kwa watu wenye ulemavu kuhakikisha wanapata elimu na vifaa saidizi ambavyo vitahitajika.

Hayo yamesemwa leo Februari 22, 2024 na Naibu Katibu Mkuu, Ofisi ya Rais Tawala za Mikoa na Serikali za Mitaa anayeshughulikia Afya, Dkt. Wilson Mahera katika Maadhimisho ya Kitaifa ya Maandishi ya Braille (walemavu wasioona) ambayo yamefanyika Mkoani Singida, katika Halmashuri ya Manispaa Singida.

Kauli mbiu ya Maadhimisho ya Braille kwa mwaka huu inasema 'Eneza Ufahamu umuhimu Braille'.

Katika maadhimisho hayo, Serikali ya Awamu ya Sita inayoongozwa na Dkt. Samia Suluhu Hassan ambaye ni Rais wa Jamhuri ya Muungano wa Tanzania, imepanga kuhakikisha inaendelea kutoa sapoti ya elimu na vifaa saidizi kwa wote wenye changamoto ya Braille kuanzia hatua ya awali.

Dkt. Mahera alieleza kuwa, Serikali imekuwa ikitumia fedha nyingi kuhakikisha elimu na vifaa saidizi vinawafikia walengwa wote.

"Katika eneo la elimu kwa walemavu (wasioona) kwa mwaka 2022-23 tumefanikiwa kuwaandikisha wanafunzi wa awali wapatao 2873, wasichana 1328 na wavulana1545, kwa upande wa shule ya msingi wanafunzi 3685 waliandikishwa, wasichana 1768 na wavulana 2217.

"Elimu ya Sekondari waliandikishwa wanafunzi 1784, wasichana 837, wavulana 947, lakini kuna wale MMEKWA waliandikishwa 243, wasichana 120 na wavulana 123.

"Lakini katika kuboresha elimu kwao, Serikali imejenga mabweni 50 katika Halmashuri 50 na hii inathibitisha nia njema ya serikali ya awamu ya sita katika kuhudumia watu wenye ulemavu.

"Serikali inawashirikisha vyema wadau ambapo kwa pamoja wanaendesha kampeni ya kutoa huduma saidizi mashuleni kwa watoto wa kike kama kutoa taulo za kike, kampeni hizi zinaunga mkono Serikali katika upatikanaji wa mahitaji ya watoto wenye ulemavu," alisema Dkt. Mahera.

Aidha Dkt Mahera alisisitiza kuwa Serikali imeendelea kushirikiana na wadau kwa kutoa vifaa.

"Serikali kwa kushirikiana na wadau inaendelea kutoa vifaa saidizi kwa kutumia bajeti yake yenyewe na kushirikiana na wadau kama ambavyo mmeona leo hapa.

"Lakini kupitia fedha za mkopo kutoka kwa Shirika la Fedha Duniani, Serikali imetumia kiasi cha milioni 770 kununua vifaa saidi kwa ajili ya walemavu kama Bajaj, Shime Sikio, vifaa vya kukuzia usikivu, kompyuta mpakato na vishikwambi.

"Serikali na wadau wake kupitia Ofisi ya Waziri Mkuu Kazi, Vijana, Ajira na Ulemavu imetoa fimbo nyeupe 35, mafuta kinga 35, viti mwendo 35," alibainisha Dkt. Mahera.

Naye Mwenyekiti wa Jumuiya ya Wasioona Tanzania, Omary Itambu, amemshukuru Rais Jamhuri ya Muungano wa Tanzania, Dkt. Samia Suluhu Hassan kwa sapoti kubwa ambayo amekuwa akitoa kwa upande wao.

Kiongozi huyo amefunguka kuwa: "Serikali hii imekuwa ikitupa sapoti hasa mama yetu (Rais), mfano TAMISEMI iligawa vishikwambi kwa walimu, lakini haikubagua, walimu wasioona wote walipata na ninaamini mambo mazuri yanakuja.

"Rais amefanya makubwa sana kwetu hasa kwa upande wa elimu na sasa tunamuomba aongeze nguvu kwenye suala la afya."