SERIKALI YASIFU UWEKEZAJI WA MKOA WA SINGIDA KATIKA MAONESHO YA NANENANE

Posted on: August 3rd, 2024

Serikali imeupongeza Mkoa wa Singida kwa maandalizi bora katika uonyeshaji wa bidhaa na teknolojia mbalimbali zinazozalishwa mkoani humo, hatua inayotarajiwa kuvutia wawekezaji na kuimarisha sekta mbalimbali za uchumi. Pongezi hizo zilitolewa na Naibu Waziri wa Kilimo, David Silinde, alipokuwa akitembelea banda la mkoa huo katika Maonesho ya Kimataifa ya Nane Nane yanayofanyika katika Viwanja vya Nzuguni, Dodoma.

Akizungumza baada ya ziara yake, Naibu Waziri Silinde aliwataka wananchi kutoka mikoa ya Kanda ya Kati kujitokeza kwa wingi kuhudhuria maonesho hayo, akisema kuwa ni fursa muhimu ya kujifunza teknolojia mpya za kilimo ambazo zitaongeza tija na ubora wa uzalishaji. “Natoa rai kwa wananchi wote hasa wa mikoa ya Kanda ya Kati kujitokeza kwa wingi katika Maonesho ya Nane Nane. Mkajifunze mbinu mpya za kilimo kisasa ili kuongeza uzalishaji," alisisitiza Silinde.

Wakati huohuo, viongozi mbalimbali waliendelea kutembelea mabanda ya maonesho, akiwemo Katibu Mkuu Mstaafu wa CCM, Philip Mangula, ambaye pia alitembelea banda la Singida na kujionea shughuli za kilimo na ufugaji zinazofanywa na wakulima wa mkoa huo.

Mangula alionyesha kuridhishwa na juhudi za mkoa wa Singida katika kuimarisha kilimo na ufugaji, akisema kuwa ni mfano mzuri wa kuigwa na mikoa mingine nchini.