SERUKAMBA AKABIDHI MIPIRA 1000, ATOA MAAGIZO MAAFISA MICHEZO

Posted on: March 5th, 2024

Mkuu wa Mkoa wa Singida,Peter Serukamba amekabidhi mipira 1000, kwa Halmashauri saba za Mkoa wa Singida na kutoa maagizo kwa Maafisa Michezo wa Halmashauri zote kuhakikisha viwanja vya michezo vilivyobadilishwa matumizi kurejeshwa kwa ajili ya michezo.

Serukamba ametoa agizo hilo, wakati akikabidhi mipira hiyo kwa Maafisa Elimu wa Halmashauri saba za Mkoa wa Singida, leo Machi 5, 2024 katika Shule ya Msingi Ukombozi, Manispaa ya Singida.

Kiongozi huyo ametoa maagizo kwa Maafisa Michezo wa Halmashauri zote akisema viwanja vyote vya michezo vilivyobadilishwa matumizi virejeshwe mara moja nakutoa mwezi mmoja wa utekelezaji wa agizo hilo.

“Viwanja vya michezo visibadilishwe matumizi bila ya kuwa na eneo mbadala hapa na waagiza Maafisa Michezo wote wa Halmashauri kila eneo ambalo lilikuwa na uwanja wa michezo ukabadilishwa matumizi basi maeneo hayo yarudishwe na nipewe ripoti ndani ya mwezi mmoja “ amesema Serukamba

Aidha amezitaka shule zote kuwa na miundombinu ya michezo na kuzingatia vipindi vya michezo shuleni kwani itasaidia kunyanyua viwango vya taaluma kwa watoto hao.

Mipira hiyo 1000, imetolewa na Shirikisho la Soka Tanzania (TFF) kupitia program ya “Football for Schools” ikiwa ni jitihada za kuunga mkono Serikali ya Awamu Sita ya Dkt Samia Suluhu Hassan, Rais wa Jamhuri ya Muungano wa Tanzania, katika kuendeleza michezo shuleni .

Serukamba amewata maafisa elimu hao kuhakikisha kuwa mipira hiyo inawafikia wahusika shuleni na iwe chachu katika kukuza vipaji na kunyanyua taaluma kwa wanafunzi.

Naye Mwenyekiti wa Chama cha Soka Mkoa wa Singida(SIREFA), Hamisi Kitila, ametoa shukrani kwa Rais wa Shirikisho la Soka Tanzania (TFF), Wallace Karia, kwa kuwapatia mipira ambayo lengo lake ni kukuhakikisha mchezo wa soka unakuwa kuanzia ngazi ya awali.

Aidha Kitila ameishukuru Serikali ya Jamhuri ya Muungano wa Tanzania chini ya Rais Dkt Samia Suluhu Hassan, kwa kuunga mkono michezo na kuweka mazingira mazuri ya kukua kwa soka nchini.

Programu hiyo ya “Football for Schools” imefika katika mikoa 12 ya Tanzania Bara na mikoa miwili kutoka Zanzibar lengo likiwa ni kukuza soka kuanzia ngazi ya chini.