SPIKA TULIA AXON AWATAKA MAAFISA HABARI SERIKALINI, KUACHA USIRI KWA TAARIFA ZISIZOKUWA ZA SIRI

Posted on: March 28th, 2023

SPIKA wa Bunge wa Tanzania, Tulia Axon amewataka Maafisa Habari na Uhusiano Serikalini, kuacha usiri wa taarifa za wazi katika taasisi zao, ili kurahisisha upashanaji habari, baina ya Serikali na wananchi wake.

Tulia ameyasema hayo leo 27, March 2023, wakati akitoa salamu kwa maafisa hao, kabla ya ufunguzi wa kikao cha 18 cha Maafisa Habari, uhusiano na mawasiliano Serikalini, kwenye ukumbi wa mikutano wa kimataifa wa Mwalimu Julius K. Nyerere, Jijini Dar es Salaam.

"Tuwasaidie wananchi na viongozi kupata taarifa kwenye mitandao ya Serikali...Wabunge wanapojenga hoja wakiingia tu kwenye tovuti, basi mara moja wanapata takwimu na taarifa zilizo sahihi," amesisitiza Spika.

Aidha ili kuiwezesha jamii kupata taarifa maendeleo zinazo tekelezwa na Serikali yao, Spika amewataka maafisa habari,uhusiano na mawasiliano ya Umma serikalini, kujikita katika weledi, lakini kwa kuzingatia miiko ya kazi.

Amesema ni wajibu kwa maafisa habari na mawasiliano kuhakikisha taarifa sahihi zinawafikia wananchi na kuyaelewa kwa kina yale yanayotekelezwa, hali itakayosaidia jamii kujenga imani kubwa na Serikali yao.

Kupitia salamu hizo, Spika amewataka maafisa hao kuhakikisha tovuti za taasisi zao zinabeba taarifa sahihi, Ili kuwasaidia viongozi na wananchi kuelewa yale yanayojiri, kila wanapohitaji kupata kwa wakati taarifa.

Katika hatua ingine Spika amesema pamoja na maafisa hao kuripoti taarifa kwenye tovuti za umma, wanatakiwa pia kuwa na uelewa mpana zaidi wa sekta mbalimbali mkoani, wizara na kuielewa Ilani ya CCM, kutokana na Serikali iliyopo madarakani, kuwa inatekeleza Ilani husika.

Kikao cha 18 cha Maafisa Habari, Uhusiano na mawasiliano ya umma Serikalini, kinachoendelea Jijini Dar ves Salaam, ni cha muda wa siku tano, na kauli mbiu yake ni “Mawasiliano ya Kimkakati.Injini ya Maendeleo."