SUWASA KUMALIZA CHANGAMOTO YA MAJI MANISPAA YA SINGIDA

Posted on: September 15th, 2023

Mamlaka ya maji safi na usafi wa Mazingira (SUWASA) imeweka mikakati mbalimbali ili kukabiliana na changamoto zinazoikabili katika utoaji wa huduma kwa wananchi katika Manispaa ya Singida.

Hayo yameelezwa na Mkurugenzi  Sebastian Warioba wa SUWASA katika kikao maalumu kilichoshirikisha Madiwani na timu ya Menejimenti  ya Manispaa ambapo alitaja kuwa moja ya changamoto ni kukatika kwa umeme mara kwa mara kunakoathiri suala zima la usambazaji wa maji.

Mkurugenzi huyo aliwaeleza Madiwani kuwa uwepo wa miundombinu chakavu katika vyanzo vya maji umekuwa changamoto katika utoaji wa huduma ya maji kwa wananchi wa Manispaa ya Singida.

Aidha Mkurugenzi huyo wa maji amewaelezea madiwani kuhusu mrado wa maji wa Miji 28 ambao Manispaa ya Singida ni miongoni mwa wanufaika.

Warioba katika kikao hicho amefafanua pia kuhusu Kata mbili za Mtamaa na Mwankoko na kusema kata hizo zitahudumiwa kupitia bajeti ya serikali ya kila mwaka kwa mamlaka zenye changamto za maji

Mkurugenzi Warioba ametoa matumaini kwa Madiwani na Wananchi wa Manispaa ya Singida kwa kueleza kuwa SUWASA ni miongoni mwa mamlaka inayounda  timu  inayoshughulikia  kufwatilia mradi wa upatikanaji wa maji kutoka ziwa Victoria ambao utakuja kumaliza changamoto ya maji kabisa kwa asilimia 100 katika Manispaa ya Singida.