TALGWU SINGIDA YAUNGA MKONO JITIHADA ZA MHE. RAIS ZA KULETA MAENDELEO KWA WANANCHI...

Posted on: January 10th, 2024

Chama cha Watumishi wa Serikali za Mitaa (TALGWU) mkoani Singida kimeunga mkono jitihada za serikali za kuwaletea wananchi maendeleo kwa kutoa mchango katika ujenzi wa Jengo la Mama na Mtoto katika Zahanati ya Unyamikumbi, Manispaa ya Singida.

Akitoa mchango wa chama hicho leo, Mwenyekiti wa TALGWU Mkoa wa Singida, Bi. Agness Lucas John, amesema chama cha TALGWU mkoa wa Singida kimeridhishwa na utendaji kazi wa watumishi Manispaa ya Singida pamoja na mahusiano mema baina ya Manispaa ya Singida na Chama hicho.

“Mahusiano mema siku zote ni ishara njema katika kufikia malengo.” amesema Bi. Agness

Mwenyekiti huyo ambaye aliambatana na Katibu wa TALGWU mkoa Sunday Christopher Nzaligo, Mwenyekiti wa TALGWU Wilaya, Bahati John na katibu wa Wilaya William Mbezi, amekabidhi mifuko 10 ya saruji na kusema kukamilika kwa jengo la mama na mtoto katika Zahanati ya Unyamikumbi, kutawawezesha wananchi kupata huduma bora lakini pia watoa huduma wa afya kufanya kazi katika mazingira bora na hivyo kuongeza ari katika kutekeleza majukumu yao.

Naye Kaimu Mkurugenzi wa Manispaa ya Singida , Edward Mboya, ambaye pia ni Mkuu wa Idara ya Utawala na Rasilimali watu, ametoa pongezi kwa uongozi wa TALGWU mkoa kwa kuguswa kwenye shughuli za maendeleo, na kuwataka kutosita wakati mwingine na kwamba milango iko wazi kwa ushirikiano.

Aidha Mboya amesema, wajibu wa mwajiri ni kutoa ushirikiano kwa vyama vya wafanyakazi, ambapo alipongeza pia ziara iliyofanywa hivi karibuni na viongozi wa chama cha TALGWU katika baadhi ya kata na kusema ziara kama hizo husaidia kubaini changamoto zinazowakabili watumishi na wananchi hivyo kushirikiana katika kuzitatua.

Akipokea mchango huo wa chama cha TALGWU, Naibu Meya wa Manispaa ya Singida Geophrey Mdama, amekipongeza chama hicho kilichojitoa kwa ajili ya wananchi wa Singida na kusema“ Ilani ya CCM imetekelezwa kwa vitendo”.

Kwa mujibu wa Mwenyekiti wa TALGWU wilaya ya Singida Mjini, Bahati John, hadi kufikia Desemba 2023, jumla ya wananchama 343 wameweza kusajiliwa kupitia matawi 07 yaliyoanzishwa hivi karibuni.