TANESCO MKOA WA SINGIDA YAPONGEZWA KWA USHIRIKISHI MZURI WA CHAMA PAMOJA NA TAASISI ZA SERIKALI

Posted on: January 8th, 2024

Mstahiki Meya wa Manispaa ya Singida, Yagi Maulid Kiaratu ameipongeza TANESCO kwa  kujitahidi kuwa na mahusiano mazuri na Taasisi mbalimbali za serikali pamoja na Chama cha Mapinduzi  kwa kuwashirikisha viongozi hao kwa lengo la kutangaza huduma wazitoazo pamoja na kupokea maoni na changamoto mbalimbali  ili kuweza kuzitatua na kuleta maendeleo kwa wananchi.

Hayo yamesemwa  January 08, 2024 katika kikao kazi kilichoandaliwa na Shirika la Umeme Tanzania (TANESCO), kilichohusisha wadau mbalimbali wa umeme wakiwepo viongozi wa Chama na serikali pamoja na Taasisi mbalimbali za Serikali.

Mstahiki Meya pamoja na Mwenyekiti wa Chama cha Mapinduzi (CCM), Bi Lucia Mwiru wamempongeza Rais Dkt. Samia Suluhu Hassan kwa kutoa zaidi ya bilioni 3.4 kwa ajili ya kutekeleza miradi ya umeme katika Mkoa wa Singida ambapo pia wamelishukuru Shirika la Umeme Tanzania (TANESCO) Mkoa wa Singida kwa kuonyesha ushirikiano mkubwa kwa Chama na Serikali na kuliomba kuendelea kuzitendea haki fedha zilizopokelewa  na kuzifanyia kazi iliyokusudiwa na serikali na kutekeleza miradi hiyo kwa wakati uliopangwa.

Madiwani wa Manispaa ya Singida wamewakumbusha TANESCO kuendelea kuelimisha wananchi wa Mkoa wa singida kuhusu miradi inayoletwa na Serikali ili kutoa mikanganyiko ya gharama za uvutaji umeme inayotokea kutokana na utofauti wa ufadhili wa miradi inayosambaza umeme Manispaa ya Singida.

Katika kikao kazi hicho madiwani wa Manispaa ya Singida pia wameipongeza TANESCO kwa huduma nzuri pamoja na ushirikishi mzuri kwa viongozi wa serikali  pia kuzidi kupambana kusambaza umeme katika kata zilizopo pembezoni mwa Manispaa.

Pamoja na hayo madiwani wameliomba shirika hilo kuwashirikisha hasa kwa maeneo yanayogusa kata zao ili kutambua vijiji na vitongoji  vyenye uhitaji zaidi wa huduma ya nishati ya umeme.

Mpaka sasa serikali imefanikisha kufikisha umeme maeneneo ya vijijini kwa asilimia nyingi kupitia mradi wa REA, na baadhi ya maeneo yakiendelea kufikiwa kupitia mradi wa PERU URBAN  na baadhi ya maeneo kupitia bajeti za ndani za TANESCO.