TARURA HALMASHAURI YA MANISPAA YA SINGIDA YAWASILISHA MPANGO NA BAJETI WA MIAKA MINNE 2022/2023 - 2025/206

Posted on: January 5th, 2022

Wakala wa Barabara za Vijijini na Mijini (TARURA) katika Halmashauri ya Manispaa ya Singida imewasilisha Mpango na Bajeti kwa kipindi cha miaka minne (4) kuanzia 2022/2023 hadi 2025/2026 utakaogharimu kiasi cha Tshs.9,138,686,632.36 

Akiwasilisha mpango huo katika Baraza maalum la Madiwani la Kupitia mpango huo wa TARURA, Kaimu Meneja wa TARURA wilaya ya Singida Eng. Christopher Njalika amesema fedha hizo zinatokana na fedha za Barabara (Road Fund) kiasi cha Tshs. 1,284,671,658.09 na fedha za Tozo 1,000,000,000 kwa Mwaka.

Alisema katika mpango huu TARURA inatarajia kutekeleza ujenzi wa barabara za lami zenye urefu wa kilometa 2.4, barabara za changarawe Km.107, ujenzi wa mifereji ya maji ya mvua km.7 na ujenzi wa makalavati 95.

“Mpango huu unazingatia kwa kiasi kikubwa ukubwa wa barabara, wingi wa watumia barabara, uwepo wa taasisi, Pamoja na matatizo na kero za wananchi”, alisema.

Wakichangia mpango na bajeti hiyo, wajumbe wa bararaza hilo, walipongeza TARURA kwa kufanya mpango na bajeti yao kuwa shirikishi na kuridhika nayo. Aidha wameiomba TARURA pindi wanapopata fedha za nyongeza nje ya mpango huo kuzitumia katika Maeneo ambayo yameonekana kuwa na uhitaji mkubwa.

Naye Mstahiki Meya wa Manispaa ya Singida Mhe. Yagi Kiaratu amezitaka taasisi za Serikali kama SUASA na nyinginezo katika Manispaa ya Singida kuiga mfano wa TARURA ili kuwezesha waheshimiwa madiwani ambao ni wawakilishi wa wananchi kujadili na kutoa mapendekezo yao kwani wao ndio wanaozijua changamoto zinazowakabili wananchi kwa mapana zaidi.

“Ni vyema taasisi nyingine za Serikali zikaiga mfano wa TARURA  kwa kutushirikisha madiwani kwani  tutakuwa tumetatua changamoto kwa wananchi na kusukuma kwa Pamoja gurudumu la Maendeleo”, alisisitiza Mhe. Yagi

Aidha Mhe. Yagi alipongeza juhudi zinazofanywa na Mhe. Rais wa Jamhuri ya Muungano wa Tanzania Mhe. Samia Suluhu Hassan katika kutatua changamoto mbalimbali za wananchi hasa uhaba wa vyumba vya madarasa na madawati katika shule za msingi na sekondari nchini.

Amesema vyumba vya madarasa 42 vilivyojengwa kwa fedha za Maendeleo za UVIKO- 19 katika Manispaa ya Singida vimesaidia kupunguza tatizo la upungufu wa vyumba vya madarasa na hivyo kuwataka wataalam katika Idara za elimu na Ofisi ya mchumi Manispaa kuhakikisha inawasilisha takwimu sahihi ili kutoa sura halisi ya upungufu uliopo.