TASAF KUPANDA MITI 37,812 MANISPAA YA SINGIDA

Posted on: January 23rd, 2024

Mfuko wa Maendeleo ya Jamii (TASAF) Manispaa ya Singida, kupitia walengwa unatarajia kupanda miti zaidi ya 37,000 katika maeneo mbalimbali yakiwemo maeneo ya taasisi ndani ya Manispaa.

Wawezeshaji wa TASAF Manispaa

leo Januari 23,2024 wametembelea na kukagua vitalu vya miti ikiwa ni maandalizi ya zoezi la upandaji miti yenye ubora linalotarajiwa kufanyika Alhamisi wiki hii.

Pendo Phinias na Salma Charles wawezeshaji wa walengwa wa TASAF ambao waliongoza na Mkuu wa Kitengo cha Maliasili na Uhifadhi wa Mazingira, Jacob Chibuga , lengo likiwa ni kukagua miti bora katika vitalu tofauti kabla ya kusambazwa tayari kwa kupandwa.

TASAF imekuwa ikitekeleza miradi mbalimbali ukiwemo mradi wa upandaji miti, katika baadhi ya mitaa ambayo inatekelezwa kupitia ajira za muda kwa walengwa.

Lengo la TASAF kupita katika vitalu hivyo ilikuwa na kujiridhisha endapo miti hiyo inafaa na inatosheleza kwa zoezi lililopo mbele.

Jumla ya miti 37,812 inatarajiwa kupandwa siku ya Alhamisi ya Januari 25, mwaka huu na itasambazwa katika vijiji/mitaa 27 ndani ya Manispaa ya Singida.

Sambamba na upandaji Miti, Wawezeshaji walifanya pia ukaguzi katika barabara ya mtaa wa Mnung’una  ambayo inarekebishwa na kusimamiwa  na walengwa wa mradi wa TASAF kutoka Mtaa wa Mnun'guna, Kata ya Minga lengo  likiwa kuisaidia jamii inayozunguka eneo hilo.

Msimamizi wa miradi ya kijamii kupitia mradi wa TASAF katika Mtaa wa Mnung'una, Mwajuma Shaban Simba ambaye pia anasimamia mradi wa Barabara (PWP) yenye urefu wa km. 1.4 ameipongeza serikali kwa kuwapatia ajira za muda walengwa wa TASAF kwani ajira hizo zimekuwa msaada kwao na familia zao kutokana na kipato wanachopata pindi wanapotekeleza ajira za muda.