TEHAMA ITUMIKE KUKABILIANA NA TATIZO LA UHABA WA WALIMU

Posted on: April 5th, 2024

Mkuu wa Mkoa wa Singida, Halima Dendego, amezitaka halmashauri mkoani humo kufundisha kwa njia ya TEHAMA ikiwa ni njia mbadala ya kukabiliana na tatizo la uhaba wa walimu katika baadhi ya masomo.

Wito huo umetolewa jana, Aprili 4, 2024 na Mkuu huyo wa mkoa wakati akihitimisha kikao cha kujadili Hoja za Ukaguzi za Mkaguzi Mkuu wa Serikali (CAG) pamoja na utekelezaji wa maagizo ya Kamati ya Bunge, kikao kilichohusisha wajumbe wa Kamati za Fedha na wataalamu katika halmashauri saba za Mkoa wa singida.

Dendego amesema njia ya TEHAMA imeonesha mafanikio katika kukabiliana na changamoto ya uhaba wa walimu hivyo kuwataka wakurugenzi kuhakikisha ufundishaji huo unazingatiwa katika shule za msingi na sekondari katika kila Halmashauri.

Pamoja na ufundishaji kwa njia ya TEHAMA ameitaja njia ya pili kuwa ni kufanyika kwa  msawazo wa watumishi wa kada mbalimbali ili kukabiliana na changamoto ya uhaba wa watumishi  katika halmashauri .

“Wapo watumishi wanasingizia ugonjwa, naagiza msawazo ufanyike” amesisitiza na kuongeza kuwa lengo ni kuhakikisha wananchi wanapata huduma nzuri kwa wakati lakini pia ni utekelezaji wa Ilani ya uchaguzi ya CCM 2020-2025.

Aidha kiongozi huyo amezitaka Halmashauri kuwa na mpango wa kuwabaini wahitimu wa elimu ya juu ili kuweza kuwatumia kufanya kazi kwa mkataba na hivyo kuondoa mkwamo katika utekelezaji wa shughuli mbalimbali kutokana na changamoto ya uhaba wa watumishi katika kada mbalimbali

Mkuu wa mkoa ameziagiza pia Halmashauri kuhakikisha hazizalishi madeni na ziweke mikakati madhubuti ya kulipa madeni ya wazabuni sambamba na madai ya watumishi.