TUME YA UCHAGUZI YASHAURI KATA YA MANDEWA KUGAWANYWA

Posted on: February 13th, 2023

Halmashauri ya Manispaa ya Singida imeshauriwa kuangalia uwezekano  wa kuigawa kata ya Mandewa ambayo imeelezwa kuongoza kwa  ukumbwa wa eneo na  idadi ya watu inayokadiriwa kuwa zaidi ya wakazi 40,000  hali inayoashiria kuwepo kwa ongezeko la idadi ya vituo vya kupigia kura katika Kata hiyo.

Ushauri huo umetolewa na timu kutoka Tume ya Taifa ya Uchaguzi ikiongozwa na Leonard Tumua, ambaye ni Mkurugenzi wa Rasilimali watu  na Utawala wa Tume hiyo ambao walifika kukagua vifaa kwa ajili ya zoezi la upigaji kura vilivyohifadhiwa katika stoo ya Halmashauri  sambamba na kutembelea kata za Mandewa na Misuna ambazo zinakadiriwa kuongoza kuwa ukubwa wa eneo, umbali  na wingi wa wakazi .

“Umbali, ukubwa na wingi wa watu katika kata ya mandewa na misuna kunaashiria ongezeko la vituo vya kupigia kura na uboreshaji wa daftari la mpiga kura” amesema Tumua.

Tumua pia ameshauri, zoezi la upangaji  vituo, liendane na taarifa za sensa ya watu na makazi ya mwaka 2022 ili kuepuka upotoshaji wa takwimu.

Kaimu Mkurugenzi wa Manispaa ya Singida Jeshi Lupembe, amesema kuhusiana na suala la kugawa kata hizo mbili, tayari Manispaa imeliona na kwamba taratibu ama mchakato wa kuomba kuzigawa unaanzia kwenye kata husika.

Aidha Jeshi amesema tayari Halmashauri ya Manispaa imeanza mchakato wa kufuta vijiji katika Manispaa ya Singida zoezi linaloratibiwa na Mwanasheria wa Manispaa, Bahati Kikoti. Manispaa ya Singida ina jumla ya Kata 18,vijiji 19, mitaa 53 na vitongoji 83.

Naye Afisa Uchaguzi wa Manispaa ya Singida Edson Ndomba, ameshauri kuanza kwa mchakato wa kubaini vituo vipya vya kupiga kura mapema sambamba na vituo vya uboreshaji daftari la mpiga kura.

Aidha imeshauriwa pia suala la elimu kwa mpiga kura lipewe umuhimu kwa rika zote ili elimu iwafikie walengwa kwa kina hasa makundi ya vijana katika maeneo yote na hasa yale yenye idadi kubwa ya wakazi na pia kwa kuzingatia ukubwa na umbali uliopo.

Naye Mstahiki Meya wa Manispaa ya Singida Yagi Maulid Kiaratu, aliishukuru timu hiyo kutoka Tume ya Taifa ya Uchaguzi, na kuwataka kubaini vituo vipya kwa wakati sambamba na kutoa elimu kwa wakazi wa Manispaa mapema ili wananchi waweze kujitokeza katika zoezi la kuboresha daftari la mpiga kura tayari kwa chaguzi zijazo.

Mstahiki meya alikiri kuwepo kwa Kata zenye maeneo makubwa, idadi kubwa ya wakazi na  umbali mrefu, na kusema ipo haja ya kuyagawa maeneo hayo.