TUME YA UTUMISHI YA WALIMU SINGIDA YAWATAKA WALIMU KUZINGATIA SHERIA,KANUNI NA MIONGOZO INAYOTOLEWA NA SERIKALI

Posted on: March 20th, 2023

TUME ya Utumishi wa Walimu (TSC), imewataka watumishi wa sekta ya elimu Wilayani Singida, kuimarisha utendaji wao wa kazi, na kutii sheria, kanuni, taratibu na miongozo kutoka mamlaka za nchi, ili kueipuka hatari ya kuadhibiwa, ikiwemo kupoteza ajira.

Hayo yamesemwa na Kaimu katibu wa Tume ya utumishi wa walimu wilaya ya Singida Fundikira Kamisula, ambapo kupitia mafunzo hayo, nidhamu, usimamizi wa sheria na miongozo inayotoka serikalini itaimarika.

Kwa mujibu wa Fundikira, mafunzo hayo yatakuwa endelevu kwa watumishi wa sekta ya elimu, ili kuwakumbusha wajibu wao lakini pia  hatari ya kupoteza ajira kutokana na ukiukwaji wa sheria, kanununi na miongozo ya elimu, ikiwemo utoro kazini kwa muda wa siku tano bila taarifa.

Amesema walimu wakuu wa shule za msingi na wakuu wa shule za sekonndari wamebeba jukumu kamili la kuwa na mamlaka ya nidhamu kwenye eneo husika, kabla ya mtuhumiwa kufikishwa ngazi za juu.

“Mafunzo haya, yanawapa uwezo wa kutambua namna ya kusimamia ipasavyo maadili ya kazi yenu walimu na utumishi wa walimu, pia namna ya kusimamia utendaji mzuri wa walimu, kwa kuzingatia kanuni zilizofafanuliwa vizuri zaidi,”alifafanua Fundikira.

Fundikira amesema kuwa, sheria na kanuni za utumishi tangu awali zilikuwepo, lakini hivi sasa zimefafanuliwa vizuri zaidi, ili kumwezesha mwalimu kupata uelewa kwa wepesi kwa ajili ya kumwepusha na makosa mbalimbali.

“Suala la utoro wa siku zaidi ya tano, bila ruhusa wala sababu za msingi, mwalimu huyo ametenda kosa ambalo ikibainika kwamba ametenda kosa hilo, adhabu yake ni moja tu, ni kufukuzwa kazi,”amesema Fundikira.