TUNAJIVUNIA AMANI NA UTULIVU NCHINI- MURAGILI

Posted on: December 9th, 2023

Mkuu wa wilaya Mhandisi Muragili amewaongoza wananchi wa Wilaya ya Singida katika kuadhimisha miaka 62 ya Uhuru kwa kufanya usafi na kuzuia maji kwenda katika makazi ya watu katika kata ya Minga eneo  la Mnung’una Manispaa ya Singida

 Zoezi hilo pamoja na wananchi lilishirikisha pia viongozi mbalimbali wa Chama na Serikali.

Miongoni mwa viongozi hao ni Mstahiki Meya wa Manispaa ya Singida Yagi Kiaratu, Mkurugenzi wa Manispaa ya Singida Jeshi Lupembe, Katibu Tawala wilaya ya Singida, Bi. Naima Chondo, wajumbe wa kamati ya Usalama ya Wilaya, Mwenyekiti wa Chama Cha Mapinduzi (CCM) wilaya ya Singida Mjini, Bi. Lucia Mwiru, wakuu wa Taasisi mbalimbali, Madiwani, wakuu wa Idara na Vitengo walioongozana na watumishi katika Idara na vitengo hivyo.

“…Tunamshukuru Rais wetu kwa kutambua umuhimu wa  jamii, ndiyo maana alitangaza kuwa siku kama yale leo zifanyike shughuli za kijamii na sisi tulianza jana kwa kupanda miti zaidi ya 500 na kutoa huduma mbalimbali za kijamii , kutembelea wagonjwa pamoja na kufanya kufanya usafi..." Amesema Mkuu wa wilaya.

 Amesema miti iliyopandwa ni kumbukumbu tosha ya maadhimisho haya na kwamba miti hiyo itaishi kwa muda mrefu na kushuhudiwa na vizazi vijavyo.

Mhandisi Muragili amepongeza wananchi na viongozi waliojitokeza katika kilele Cha maadhimisho ya miaka 62 ya Uhuru wa Tanganyika na kufanya kazi za kijamii hasa kudhibidi mafuriko ya maji kuelekea kwenye makazi ya watu katika eneo hilo.

 "kipindi hiki cha mvua nimekuwa nikipokea malalamiko kuhusu mafuriko

Ndiyo maana maadhimisho ya mwaka huu tumeamua  kuungana na jamii ya hapa kuweza kuthibiti hali ya maji kwenda katika makazi " amesema.

Akihitimisha hotuba yake Mkuu huyo wa wilaya amewashukuru wote walioshiriki kufanya kazi hiyo na kutoa maelekezo kwa viongozi wa mtaa wa Mnu'nguna akiwemo Mh Diwani(Minga) ya kutunza vizuizi vya maji vilivyowekwa eneo hilo haviondolewi kwa kuweka  ulinzi Ili kuepusha madhara yatakayotokana na mafuriko nyakati hizi za mvua.

Aidha kulingana na hali halisi ya eneo hilo, Mkuu wa wilaya Mhandisi Muragili ameahidi kuleta  'excavetor' Kwa ajili ya kuzibua  mitaro lakini pia zaidi kuwasihi wananchi kuendelea kutunza mazingira.