"TUWAJIBIKE KATIKA MAPATO, TUSHIRIKIANE KWA PAMOJA KWA AJILI YA HALMSHAURI"

Posted on: February 9th, 2026

“Tukawajibike katika mapato, tushirikiane kwa pamoja kwa ajili ya Halmashauri”

Mstahiki Meya wa Manispaa ya Singida, Geofrey Mdama, ametoa wito kwa viongozi na watendaji wa Manispaa hiyo kuongeza juhudi katika ukusanyaji wa mapato ya ndani, akieleza kuwa mapato hayo ni nguzo muhimu katika kukuza uchumi wa Manispaa na kuharakisha utekelezaji wa miradi ya maendeleo kwa wananchi.

Mdama ametoa kauli hiyo leo Februari 9, 2026, wakati wa Mkutano wa Baraza la Madiwani wa Robo ya Pili ya mwaka, uliofanyika katika Ukumbi wa Halmashauri ya Manispaa ya Singida, ambapo masuala mbalimbali ya maendeleo na utendaji wa halmashauri yalijadiliwa.

Amesema ukusanyaji mzuri wa mapato unaongeza uwezo wa halmashauri kutoa huduma bora za kijamii ikiwemo elimu, afya na miundombinu, pamoja na kutekeleza miradi ya kiuchumi inayolenga kuboresha maisha ya wananchi.

Katika hatua nyingine, Meya amewataka Waheshimiwa Madiwani kuwa mstari wa mbele katika kuhamasisha wananchi kushiriki kikamilifu katika ulipaji wa mapato halali, akisisitiza kuwa ushiriki wa wananchi ni msingi wa mafanikio ya mipango ya maendeleo.

Aidha, amewataka wajumbe wa Timu ya Menejimenti ya Halmashauri (CMT), timu za mapato na watendaji wa kata kufanya kazi kwa weledi, uadilifu na uwajibikaji, huku akisisitiza mshikamano na ushirikiano kama njia pekee itakayoiwezesha Manispaa ya Singida kufikia malengo yake ya maendeleo endelevu.