UKUAJI WA MANISPAA, UENDANE NA HUDUMA BORA ZA JAMII - MBUNGE SIMA

Posted on: May 4th, 2024

Mbunge wa Jimbo la Singida Mjini, Mussa Ramadhan Sima, ameitaka Halmashauri ya Manispaa ya Singida kuhakikisha huduma za jamii zinazotolewa, zinaendana na ukuaji wa mji hasa kuelekea kuwa Jiji.

Mbunge Sima amesema hayo, leo Mei 04, 2024 wakati akikabidhi gari la wagonjwa na vifaa tiba kwenye Hospitali ya Manispaa. Halmashauri ya Manispaa ya Singida ni miongoni mwa halmashauri ambazo zimepokea Magari ya wagonjwa na vifaa tiba ni kutoka Serikali kuu katika jitihada za kuboresha huduma za afya.

Akiongea na watumishi na viongozi mbalimbali katika hafla ya kukabidhi vifaa hivyo, Mbunge Sima amemshukuru Rais wa Jamhuri ya Muungano wa Tanzania, Dkt Samia Suluhu Hassan kwa kusikia kilio cha wananchi wa Jimbo la Singida Mjini, Kwa kuwapatia magari 2 ya wagonjwa, dawa na vifaa tiba vyenye thamani ya zaidi ya Shilingi milioni 450 na kuongeza kuwa tayari maombi ya fedha kwa ajili ya ukarabati wa majengo ya zamani ya hospitali hiyo ya Manispaa yameshawasilishwa Ili mwonekano wa hospitali hiyo uendane na hadhi ya mji hasa katika safari yake ya kuwa Jiji.

" ...hatuwezi kuwa na hospitali ndani ya mji unaoelekea kuwa Jiji, ambao mwonekano wake hauendani na hadhi ya mji. Tayari tumeiomba Serikali itupatie fedha kwa ajili ya ukarabati wa majengo hayo" amesema Sima.

Amesema asilimia 90 ya ununuzi wa dawa na vifaa tiba umeshafanyika na kwamba kilichobaki ni kutoa huduma sahihi na kwa wakati kwa wagonjwa jambo ambalo amesema litapunguza ama kumaliza kabisa malalamiko kuhusiaña na ubora wa huduma.

Mbunge Sima ameongeza utekelezaji na usimamizi wa miradi ya afya inayoendelea kutekelezwa ya jengo la wazazi pamoja na jengo la huduma za dharura ambapo amesema miradi hiyo inatekelezwa kwa kiwango chenye ubora kwa kutumia _force account_.

 Sima amepongeza na kihimiza ushirikiano baina ya watumishi, viongozi wa chama na Serikali pamoja na jamii, na kusema ushirikiano uliopo utapunguza kero na malalamiko ya wananchi kuhusiana na huduma za afya.

" Jukumu la usimamizi wa huduma ni letu sote...tushirikiane ku-solve_matatizo Ili huduma ziwe bora.” amesisitiza.

Naye katibu wa CCM Wilaya ya Singida Mjini, Neema Luga, ameshukuru Mhe. Rais wa Jamhuri ya Muungano wa Tanzania Dkt Samia Suluhu Hassan kwa kulitendea haki Jimbo la Singida Mjini Kwa miradi mbalimbali hasa ya Afya.

"Tunamshukuru Mhe. Rais Dkt Samia Suluhu Hassan kupitia mwakilishi wetu Mhe. Mbunge kwa miradi ya afya, Magari ya wagonjwa, dawa na vifaa tiba hii yote ni kututakia Wana Singida afya njema Ili tuweze kuleta Maendeleo katika Jimbo letu", amesema Luga.