UN WOMEN YATAKA WANAWAKE KUJITOKEZA KUWANIA UONGOZI KATIKA UCHAGUZI UJAO

Posted on: April 4th, 2024

Mkurugenzi Mkazi wa UN Women, Peterson Magola amesema anaamini Wanawake wengi watajitokeza katika kuwania uongozi kwenye uchaguzi wa mwaka huu, kutokana na namna walivyopatiwa elimu ya kutosha juu ya uongozi.

 Hayo yamesemwa jana, kiongozi huyo alipotembelea vikundi tofauti kujionea hali halisi ya namna Mradi wa Uongozi na Haki za Kiuchumi kwa Wanawake Serikali za Mitaa unavyofanya kazi katika kumuinua mwanamke kuanzia ngazi ya chini.

 Viongozi hao walitembelea vikundi wakiongozwa na Mkurugenzi wa Manispaa, Jeshi Lupembe ambaye aliambatana na Meya wa Manispaa, Yagi Kiaratu na wageni Peterson Magola na Juhana Leiteinen kutoka Ubalozi wa Finland na wageni wengine.

UN Women na viongozi hao walipita katika miradi mitatu ikiwemo kikundi cha Kiaratu kutoka Kata ya Majengo, Klabu ya Wanafunzi wa Shule ya Sekondari Senge na Kikundi cha Mandewa.

Mradi huo umelenga kumuinua mwanamke kiuchumi kuanzia ngazi chini kabisa, lakini pia kiuongozi kuwa mwanamke anaweza kuwa kiongozi bora kuanzia ngazi ya chini na kwa sasa ikiwa ni kuelekekea uchaguzi wa Serikali za Mitaa ambao unatarajia kufanyika mwaka huu.

Magola akiwa na kikundi cha Mandewa alinukuliwa akisema: “Kwa haya ambayo mmejifunza ninaamini kuwa mtakuwa bora huu ni mwaka 2024 ninaona kama hii ni fursa kwenu kwani ninaamini wengi mtajitokeza kugombea uongozi katika uchaguzi ujao wa Serikali za Mitaa.”

 UN Women wamekuwa wakifanya kazi kubwa na Shiriki la TUSONGE, katika Halmashauri ya Manispaa ya Singida kwa kutoa elimu kwa wanawake na watu wenye ulemavu kwa ngazi zote kuhakikisha wanajikamua kiuchumi na kiuongozi ilikuweza kutimiza malengo yao.