'USALAMA WA WATOTO UWE NI KIPAUMBELE" LUPEMBE

Posted on: October 23rd, 2023

Maafisa Maendeleo ya Jamii Manispaa ya Singida wametakiwa kusimamia na kuhakikisha usalama wa watoto wawapo nyumbani na shuleni.

Mkurugenzi wa Manispaa Ya Singida Jeshi Lupembe, ametoa Maelekezo hayo Wakati wa ufunguzi wa mafunzo kazi yaliyojumuisha maafisa Maendeleo ya Jamii , wathibiti ubora wa elimu, maafisa Ustawi wa Jamii na walimu katika ukumbi wa kituo Cha walimu Nyerere.

Jeshi amesema, mafunzo hayo ya

Mpango wa Shule Salama kwa Elimu ya Awali na Msingi una lengo la kuhakikisha usalama wa mtoto wakati wote na kuwata maafisa Maendeleo ya Jamii na maafisa Ustawi wa Jamii kuhakikisha wanatokomeza ukatili Kwa watoto.

Pamoja na hayo, Mkurugenzi huyo amewataka maafisa Maendeleo ya Jamii kuhamasisha Jamii kuhusu suala la uchangiaji chakula shuleni, uundaji wa mabaraza ya watoto, uanzishaji wa Klabu mbalimbali za malezi na makuzi lakini pia uundaji wa dawati la ulinzi na usalama wa mtoto

Amesema, mafunzo hayo pia yatawajengea uwezo walimu wa kumlinda mtoto katika mazingira ya kufundishia na kuzuia ukatili kwa watoto wawapo shuleni, njiani kwenda shuleni na kurejea majumbani .

Katika mafunzo kazi hayo, maada mbalimbali ziliwasilishwa kupitia maafisa Maendeleo ya jamii na kuchangia na Idara shiriki ya elimu Msingi na Ofisi ya Mthibiti ubora wa shule lengo likiwa ni kufanya watoto wa shule za awali na msingi wanakuwa katika maeneo salama ya kujifunzia shuleni na nyumbani.

Afisa Mthibiti ubora wa Elimu Bi. Neema Maika akichangia mada amesema, Maafisa Maendeleo wanatakiwa kushirikiana na walimu kuhakikisha mpango wa shule salama unafanikiwa licha ya uwepo wa changamoto kadhaa.

“Maafisa mnatakiwa kushirikiana na walimu kuwapa elimu ya stadi za maisha wanafunzi pale mnaposhiriki katika vikao vya shule litakuwa ni jambo bora sana kwa usalama wa mtoto," amesema.

Aidha Mthibiti Mkuu wa Ubora wa Shule, Seif Mziray katika kuchangia mada amesisitiza maafisa hao kuhakikisha wanahudhuria katika vikao ambavyo vinafanyika shuleni na kuwa na mahusiano bora na walimu ilikuona mambo yanakwenda sawa kati ya walimu, wazazi na maafisa hao.

Naye Mkuu wa Idara ya Maendeleo, Bi. Upendo Naftali ametoa rai kwa Maafisa Maendeleo kushirikiana Kwa karibu na walimu ili kuwa na mikakati bora hasa katika suala la uchangiaji wa chakula shuleni ili wanafunzi waweze kupata mlo shuleni .