USHIRIKIANO BAINA YA WAZAZI, WANAFUNZI NA WALIMU, SIRI YA KUFUTA DARAJA SIFURI SEKONDARI YA IPEMBE IPEMBE SEKONDARI

Posted on: April 6th, 2023

Ushirikiano wa wanafunzi, wazazi na walimu umetajwa kuwa msingi mkuu katika kuleta maendeleo ya elimu katika shule za sekondari na msingi katika manispaa ya Singida

Mtumishi hodari wa mwezi Machi, 2023, Mkuu wa Shule ya Sekondari ya Ipembe, Mwl. Christopher Bariki, ameshinda tuzo ya mwezi kutokana na kuiwezesha shule yake kuwa shule ya sekondari pekee iliyoweza kufuta daraja sifuri kidato cha nne mwaka 2022.

Mwalimu Christopher,amesema mafanikio aliyopata yametokana na ushirikiano mkubwa baina ya wanafunzi wenyewe, wazazi na walimu na kwamba kazi yake kama mkuu wa shule ni kuunganisha makundi hayo na hivyo kufanikiwa.

“ nimepokea kwa furaha ushindi huu kwa niaba ya walimu wenzangu, wanafunzi na wazazi, kazi yangu ilikuwa ni kuunganisha nguvu za wazazi, wanafunzi na walimu” amesema Mwl. Christopher

Ameyataja malengo ya shule hiyo kwa sasa kuwa ni kufuta daraja la nne         ( Division Four) kupitia mikakati mbalimbali waliyojiwekea shuleni hapo ikiwamo ya mafunzo rejea kwa walimu hasa katika mada ambazo ni ngumu.

Mkuu huyo wa shule ameipongeza Serikali kwa kuboresha miundombinu ya kujifunzia na kufundishia ikiwa ni pamoja na kuzipatia shule za sekondari vitabu vya kufundishia na kujifunzia.

Ametoa rai kwa watumishi wengine kufanya kazi kwa bidii ili kuunga mkono jitihada zinazofanywana Mhe.  Rais wa Jamhuri ya Muungano wa Tanzania Dkt. Samia Suluhu Hassan pamoja na viongozi wengine kwa kufanya kazi kwa bidii na maarifa ili kuhakikisha jitihada  hizo hazipotei bure.

Akimtunuku cheti mtumishi hodari wa mwezi Machi, 2023, Kaimu Mkurugenzi wa Manispaa ya Singida, Dr. Adrianus Kalekezi , amewasisitizia wakuu wa Idara na Vitengo kuendelea kutenda haki  kwa watumishi walio chini yao kwa kuwabaini watumishi wanaofanyakazi kwa juhudi na maarifa ili kuwatangaza na kuwatunuku, kama njia moja wapo ya kuwamotisha.

Amesema, Watumishi wapo wengi na wanafanya kazi lakini wapo wale ambao wameongeza juhudi na maarifa na kuiwezesha halmashauri kufikia malengo yake ya kutoa huduma bora kwa wananchi .

“ Niwasisitize wakuu wa idara na vitengo, tuendelee kutenda haki, Yule mtu anayefanya kazi kweli kwa juhudi na maarifa, tumbaini na tumtangaze ili wengine waige mfano, Amesema Kalekezi.

Zoezi la kuwamotisha watumishi hodari kila mwezi katika Manispaa ya Singida limekuwa chachu kwa watumishi na kuwafanya kujituma zaidi katika utendaji kazi wao kama ambavyo dhima  na maono ya Manispaa ya Singida inavyofafanua .

Programu hii ilianza Septemba 2022, ambapo kamati inayojumuisha wajumbe wa vyama vya wafanyakazi na baadhi ya wakuu wa idara na vitengo, iliundwa ili kupitia sifa na mchango wa kiutendaji wa  watumishi wanaopendekezwa kutoka katika idara na vitengo kwa kila mwezi na hatimaye kupata mshindi.