UZINDUZI WA WIKI YA CHANJO HALMASHAURI YA MANISPAA

Posted on: April 28th, 2021

UZINDUZI WA WIKI YA CHANJO HALMASHAURI YA MANISPAA YA SINGIDA

Halmashauri ya Manispaa ya Singida imezindua wiki ya chanjo kwa wananchi wa Manispaa ya Singida zoezi ambalo limetajwa kuwa ni endelevu na kwamba wiki ya chanjo imetengwa maalum kwa ajili ya kuhimiza umuhimu wa chanjo kwa Watoto wenye umri chini ya miaka 5 na wasichana wenye umri kuanzia miaka 14.

Mkuu wa wilaya ya Singida Eng. Paskas Muragili ambaye alikuwa mgeni rasmi, amewataka wananchi kujitokeza kwa wingi kupeleka Watoto wao wenye umri chini ya miaka 5 kupata chanjo ili kuwakinga na maradhi mbalimbali hasa homa ya ini, surua na polio na wasichana wenye umri kuanzia miaka 14 kwa ajili ya chanjo ya kinga ya saratani ya shingo ya kizazi.

Amewataka wananchi waliopata fursa ya kuhudhuria uzinduzi huo kuwa mabalozi wema kutangaza umuhimu wa chanjo hizo pia kuwatoa hofu wananchi wengine kwani chanjo hizo ni bora na zimefanyiwa utafiti wa kutosha.

“Lengo la chanjo hii ni kujihakikishia afya bora katika siku za usoni kwani jamii iliyokingwa ina afya bora na hivyo kujenga taifa imara”, alisisitiza.

Aidha alisema wajibu wa afya upo kwa mwananchi mwenyewe na kwamba serikali imetimiza wajibu  wa kuwakinga kwa kuleta chanjo za kutosha.

Jumla ya Watoto 25 Wenye umri chini ya miaka 5 na wasichana 11 wenye umri kuanzia miaka 14 wamepatiwa chanjo katika siku ya uzinduzi wa wiki ya chanjo