VIJANA MANISPAA YA SINGIDA WAASWA KUUENZI MUUNGANO KWA VITENDO

Posted on: April 26th, 2025

Vijana katika Manispaa ya Singida wameaswa kuuenzi Muungano kwa kupendana, kuheshimiana, kusikilizana na kujaliana ili kudumisha umoja na uzalendo ulioasisiwa na viongozi waanzilishi.

Akifungua Kongamano la Vijana kuhusu Muungano, leo tarehe 26 Aprili, 2025 Katibu Tawala wa Wilaya ya Singida Bi. Naima Chondo amesema Vijana ndiyo wenye dhamana ya kuulinda na kuuheshimu muungano kwa kuwa ni tunu iliyoachiwa na viongozi waasisi ambao ni Mwl. Julius Kambarage Nyerere na Abeid Aman Karume.

“ Viongozi na wazee wetu waliungana kwa amani ili kutufanya tuwe pamoja kama ambavyo kauli mbiu inavyosema inatugusa sisi vijana”, amesema Bi. Chondo

Amesema Kauli mbiu ya mwaka huu inayosema “ Miaka 61 ya Jamhuri ya Muungano wa Tanzania : Muungano wetu ni dhamana, Heshima na Tunu ya Taifa : Shiriki uchaguzi  Mkuu wa mwaka 2025” nijukumu la vijana kuilinda kuheshimu na kuitunza tunu hii ili kuleta maendeleo kwa mustakabali wa vizazi na vizazi

Naye Afisa Elimu Sekondari Manispaa ya Singida Athman Mnyusi amesema, iko haja ya kuwa na midahalo/ makongamano kama haya kila mwaka ili kutoa elimu kwa vijana kuhusiana na suala zima la Muungano lakini pia kufanya shughuli za kijamii kama vile usafi, kuzindua miradi ya maendeleo na michezo ambazo kwa pamoja zinatuleta pamoja na hivyo kudumisha upendo, mshikamano, umoja, heshimia, kujaliana na kusikilizana.

“ kauli mbiu hii katika kuadhimisha miaka 61 ya Muungano imekuja wakati muafaka ili vijana kuelewa kwa uhalisia suala zima la muungano…” amesema Mnyusi

Kongamano la vijana katika Manispaa ya Singida limefanyika wakati wa kilele cha maadhimisho ya miaka 61 ya Jamhuri ya  Muungano wa Tanzania huku vijana zaidi ya 300 wakishiriki kutoka shule za  shule za sekondari za Mwenge, Mungumaji, Mughanga, Kindai, na Dr, Salmin Amour pamoja na wachokoa mada ambao ni Mwl. Ulumbi Shani (Shule ya Msingi Ukombozi), Mwl. Charles Saenda ( Mwenge Sekondari) na Mwl. Habil Ndumbaro ( Mwenge Sekondari).