'VIKUNDI VIREJESHE FEDHA ZA MIKOPO'

Posted on: March 7th, 2024

SERIKALI imevitaka Vikundi vya wanawake, vijana na watu wenye ulemavu kuhakikisha vinarejesha fedha za mikopo ya asilimia 10 ya mapato ya ndani ya Halmashauri, ili wengine waweze kukopeshwa na kusisitiza kuwa fedha hizo sio zawadi Bali ni kwa ajili ya maendeleo.

Hayo yamesemwa katika maadhimisho ya Siku ya Wanawake Duniani, katika Halmashuri ya Manispaa ya Singida na Mgeni Rasmi, Bi. Naima Chondo, ambaye ni Katibu Tawala wilaya ya Singida katika Uwanja wa Stendi ya Zamani.

Maadhimisho hayo ya Siku ya Wanawake wa Manispaa ya Singida yalihudhuriwa na viongozi wa Serikali, chama, Taasisi, watumishi wa Manispaa na wanawake wa Singida Kwa ujumla wao.

Katibu Tawala wa Wilaya Naima Chondo, amesisitiza kuwa Vikundi vilivyokopa vinapaswa kurejesha mikopo, ilikuwapa nafasi wengine ya kuchukua mikopo hiyo.

Kiongozi huyo alisema kutoka kufika Julai, 2022 hadi Februari 2023 jumla kiasi cha fedha Tsh 434,000,000, kimetolewa na Halmashauri ya Manispaa ya Singida kwa vikundi 108, wanawake wakiwa Vikundi 72, vijana 32 na watu wenye ulemavu Vikundi 04 nakusema hii ni kazi kubwa iliyofanywa na Halmashauri.

"Nitumie fursa hii kuwakumbusha kuwa fedha zilizotolewa ni mkopo na sio zawadi au msaada, mnatakiwa kuzipeleka kwenye lengo mlioombea mkopo na kuzirudisha kama mlivyoelekezwa na wataalum ili wengine waweze kukopeshwa" amesisitiza Chondo

Amesema Vikundi vinaoshindwa kurudisha Kwa wakati kutasababisha wengine kushindwa kukopa Jambo ambalo ni kosa kisheria.

"... nisisitize sana kuwa watu kuwa waaminifu kwa mikopo mliokwisha kupata na kurejesha kwa wakati kuepuka usumbufu" amesema Mgeni Rasmi.

Aidha kiongozi huyo ameendelea kiwataka wanawake kushirikiana na kujikwamua kimaendeleo katika nyanja zote huku akisema maadhimisho hayo yawe chachu ya mafanikio.

Bi Chondo ameendelea kutoa wito kwa jamii kuzingatia kuwekeza kwa wanawake ili kuharakisha maendeleo ya Taifa na ustawi wa jamii ikiwa ni Ujumbe mahususi wa siku ya wanawake Duniani Kwa mwaka 2024.