WAFANYABIASHARA WANNE WASHIKILIWA NA POLISI MANISPAA YA SINGIDA KWA KUFICHA NA KUPANDISHA BEI YA SUKARI

Posted on: January 24th, 2024

Kamati ya usalama wilaya ya Singida imefanya zoezi la kuwasaka wafanyabiashara waliopandisha bei ya sukari na kuificha kwa lengo la kuiuza kwa bei ya juu katika Halmashuri ya Manispaa ya Singida.Akiongoza zoezi hilo leo Januari 24, 2024,  Katibu Tawala Wilaya ya Singida Bi. Naima Chondo amesema, kulingana na mwongozo wa bei ya sukari uliotolewa hivi karibuni  na serikali, wafanyabiashara wa maduka ya jumla wanapaswa kuuza sukari kwa kilo kuanzia shilingi  2,650 hadi 2,800 wakati wale wanye maduka ya rejareja wanapaswa kuuza kuanzia shilingi 2,800 hadi 3,000 kwa kilo.Amesema awali kabla ya kufanyika kwa zoezi hilo, ilibainika kuwepo kwa wafanyabiashara wa rejareja wanaouza bidhaa hiyo  kwa shilingi 3,700 hadi 4,000 kwa kilo wakati wale wa maduka ya  jumla wameelezwa kupandisha bei hadi shilingi 185,000 kwa mfuko wa kilo 50.Bi. Chondo amesema kutokana na mabadiliko hayo ya bei serikali wilayani Singida imefanya msako wa wafanyabishara waliopandisha bei sambamba na kupekua stoo za baadhi ya wafanyabishara   na kufanikiwa kuwakamata wafanyabiashara wanne waliokiuka mwongozo wa bei zilizotolewa na serikali.“ Tunawaomba sana wafanyabiashara wa mkoa wa Singida  na hususani wilaya ya Singida kufuata taratibu, kanuni na sheria . Hii bidhaa pamoja na bidhaa nyingine zote zina bei elekezi, hivyo tuuze bidhaa hii kwa bei elekezi na waelewe pia kuficha bidhaa ni kosa la kuhujumu uchumi” amesisitiza Katibu Tawala.Naye wakala wa usambazaji wa sukari Mkoani Singida , Bw. Nagji amesema kulingana bei elekezi ya serikali, yeye anuza sukari hiyo  kwa shilingi 140,000 kwa Mfuko wa kilo 50 na kwamba tayari  gari mbili zilizobeba sukari zimewasili hivyo kushauri wafanyabiashara wengine kutoongeza bei.Mkuu wa Idara ya viwanda, biashara na uwekezaji Manispaa ya Singida, Erick Sinkwembe, amesema hakuna sababu kwa wafanyabiasha kuongeza bei kwani wakala wa usambazaji, amepokea mifuko 620 sawa na tani 32 za sukari leo Januari 24 na kwamba mifuko mingine 660 inatarajiwa kupokelewa Januari 25 katika Manispaa ya Singida na wilaya za jirani.Sinkwembe amewaasa wafanyabiashara kuzingatia bei elekezi ili kuondoa adha kwa watumiaji . “wakala anauza kwa bei elekezi na wafanyabiashara nao wanapaswa wauze kwa bei elekezi” amesema .Amewatoa hofu wananchi na wafanyabiashara kwa  kuwahakikishia uwepo wa sukari na kusisitiza kutopandisha bei wala kuficha bidhaa hiyo kwani sukari iliyopokelewa inatosheleza.