WAFANYABIASHARA WATAKIWA KULIPA KODI NA ADA KUPITIA MIFUMO YA ULIPAJI YA KIELETRONIKI.

Posted on: May 16th, 2023

Baraza la Biashara Wilaya ya Singida - TCCIA, limetakiwa kuwa kiunganishi kizuri kati ya wafanyabishara na serikali ili kupunguza changamoto zinazowakabili wafanyabiashara katika Wilaya Singida.

Hayo yameelezwa na Mwenyekiti wa Baraza la Biashara Wilaya ya Singida , ambaye ni Mkuu wa Wilaya ya Singida, Mhandisi PASKAS MURAGILI ambaye pia alisisitiza wafanyabiashara kulipa kodi  na ada mbalimbali zilizohalalishwa na Serikali kupitia mifumo ya serikali ya ulipaji na kupatiwa risiti za kieletroniki.

Muragili amesema Baraza hilo la Biashara linapaswa kuwa kiunganishi kati ya serikali na sekta binafsi katika masuala yote yanayohusu biashara   ili kutatua changamoto zinazowahusu wafanya biashara.

Mhandisi Muragili, ametumia fursa hiyo pia kuitaka Manispaa ya Singida kuboresha mfumo wa kutoa elimu kwa ngazi zote kuhusu tozo mbalimbali  kwa wafanyabiashara  ili kuepuka migogoro inayowezakujitokeza.

Baadhi ya wajumbe wa Baraza hilo, wameitaka serikali kupunguza mtiririko wa ada za leseni hasa katika biashara za hoteli ili kumpunguzia mzigo mfanyabiashara . Aidha tozo ya kupakia na kushusha mizigo imelalamikiwa kuwaumiza wafanyabiashara hao.

Kikao cha Baraza la Biashara Wilaya ya Singida - TCCIA,  Kimeketi kujadili namna bora ya kutatua changamoto zinazowakabili wafanyabiashara wa wilaya hiyo ikiwa ni pamoja na kuwajumuisha wafanyabishara.