WAFUGAJI WA KUKU SINGIDA WATAKIWA KUTUMIA CHANJO YA MIFUGO KUTOKA KATIKA VIWANDA VYA NDANI

Posted on: April 17th, 2023

Wafugaji Mkoani Singida wametakiwa kutumia chanjo inayotengenezwa na viwanda vya ndani, ili kukabili vita vya kiuchumi, kutokana na chanjo bandia ya kuku kuingizwa nchini, kwa lengo la kupunguza wingi wa mifugo hiyo.

Hayo yamebainishwa mkoani Singida na Dk, Charles Mayenga, Meneja wa kiwanda cha Chanjo ya Mifugo Tanzania (TVI-Kibaha), chini ya Wakala wa Maabara ya Veterinary Tanzania (TVLA), mwenye jukumu la kuzalisha na kusambaza Chanjo nchini.

Akiongea na wafugaji wa Kuku, wataalamu wa mifugo, wafanyabiashara na wamiliki wa maduka ya dawa za mifugo,katika Manispaa ya Singida, Dk.Mayenga amesema lengo la mafunzo hayo ni kuwapatia elimu washiriki juu ya uwepo wa chanjo bandia ya Matone (TEMEVAC 1-2), iliyoingizwa kwa ajili ya ugonjwa wa ’Mdondo’.

Amefafanua kuwa, chanjo ya TEMEVAC 1-2 ni muhimu katika kudhibiti ugonjwa wa ’Mdondo’ wa kuku, lakini chanjo bandia imeingizwa na hivyo kuathiri moja kwa moja uchumi wa mfugaji na Taifa kwa ujumla.

”Hii chanjo bandia ya TEMEVAC 1-2 inafanana sana na inayozalishwa na kiwanda cha Serikali cha TVI-Kibaha, na ukiichunguza sana ndipo utabaini tofauti iliyopo...ile ya bandia maandishi yake hayaonekani vizuri, ni meusi na yamechafuliwa sana,” amesema Dk. Mayenga.

Aidha Dk. Mayenga amefafanua kuwa, licha ya chanjo kutoka nje ya nchi kukabiliwa na changamoto nyingi, chanjo za ndani zina umuhimu zaidi kutokana na kuhimilimi mazingira husika, ambako zimetengenezwa.

Kutokana na hali hiyo Dk.Mayenga,ametoa rai kwa wadau hao kushirikiana pamoja katika kukabiliana na chanjo hiyo bandia, ili kulilinda soko la kuku wa asili wa mkoa wa Singida, kuku waliojizolea sifa na soko la uhakika nchini.

Baadhi ya washiriki,akiwemo mmiliki wa duka la dawa za mifugo,Dk. William Mafwere, ameipongeza serikali, kwa kuwapatia elimu juu ya kutambua chanjo bandia, jambo litakalolinda biashara kwa ajili yao na wateja wao.

Wakala wa Maabara ya Veterinary Tanzania (TVLA) hutengeneza aina saba za chanjo, ikiwemo ya Mdondo au Kideri (TEMEVAC), Homa ya mapafu ya Ng’ombe (CBPP), Homa ya mapafu ya mbuzi (CCPP), Kimeta (ANTHRAX), Kimeta na Chambavu (TECOBLAX), Chambavu (BLACKQUARER) na Kutupa Mimba (BRUCELLOSIS5-19.

Kwa mujibu wa Dk.Mayenga, chanjo hizo hupatikana makao makuu ya TVLA-Temeke Veterinari na ofisi za Kanda, ikiwemo Mwanza, Meatu, Tabora, Dodoma, Iringa, Sumbawanga, Kigoma, Tanga, Mtwara na Arusha.